Həkimləri məcbur edirlər, onlar prosesdən qaçırlar…

Bir neçə gün əvvəl Milli Məclisin Səhiyyə komitəsinin sədri Əhliman Əmiraslanov təbii yolla doğuşun sayının azalmasından gileylənib.

Ölkə.Az xəbər verir ki, deputat deyib ki, bunu müxtəlif yolla əsaslandırmağa çalışsalar da, inandırıcı görünmür.

Mövzu ilə bağlı müraciət etdiyimiz ginekoloqlar ətraflı danışmasalar da, tibbi göstəriş olmadan heç bir xəstənin qeysəriyyə əməliyyatı edilmədiyini deyiblər.

Tibb eksperti Adil Qeybulla Ölkə.Az-a açıqlamasında bildirib ki, istənilən tibbi prosedur, cərrahi əməliyyatlara dair konkret tibbi göstərişlər var:

"Bunları biz müəyyən etməmişik. Dünyanın aparıcı, mötəbər mərkəzləri tərəfindən müəyyən edilib. Biz də həmin tövsiyələrə əməl edərək, bu yolu seçirik. Əlbəttə, hər bir tibb məktəbinin öz yolu ola bilər, amma onlar ümumi prinsiplərdən kənara çıxa, ziddiyyət təşkil edə bilməz. Bu baxımdan da qeysəriyyə üsulu və təbii doğuşlara konkret göstərişlər olmalıdır. Bunun üçün doğuşun mümkün olmaması, kiçik çanaq, digər yanaşı səbəblər və s. bunları artıq həkim komissiyası təyin edir və bu fiksə edilir. Ondan sonra isə qeysəriyyə yolu ilə doğuş baş tutur".

Ekspert hesab edir ki, qadınlar bəzi hallarda təbii doğuşdan qaçdığı üçün həkimləri qeysəriyyə üsuluna məcbur edirlər:

"Təəssüflər olsun ki, bu gün müxtəlif səbəblərdən xəstələrin özləri həkimləri buna məcbur edirlər. Düzdür, ola bilər ki, müəyyən yerlərdə həkimlərin də bundan sui-istifadə etdiyi hallar olsun, amma dəqiq deyə bilərəm ki, daha çox bu təşəbbüslər xəstələr tərəfindən irəli sürülür. Xüsusilə qadınların doğuş zamanı doğuş yolların genişlənməməsi, müxtəlif fəsadların olmaması, daha çox da müxtəlif səbəblərdən bu əməliyyata gedirlər. Sadəcə doğuşdan qaçırlar. Hətta tam doğuşa normal göstəriş olduğu halda belə əməliyyata gedirlər. Düzdür, həkimlər də buna etiraz etmirlər, çünki o etiraz etsə, xəstə bunun üçün başqa həkimin yanına gedəcək. Vəziyyət budur. Təşəbbüs daha çox xəstələrdən gəlir, amma düşünürəm ki, xəstələrə də bunu izah etmək lazımdır. Xüsusilə birinci doğuş zamanı, yəni ehtiyac olmadan qeysəriyyə üsulu ilə baş tutması, gələcəkdə sonsuzluğa və başqa problemlərə gətirib çıxara bilər. Bu, risklidir. Əslində, bu riskli amil çıxış yolu olmadıqda seçilməlidir. Əfsus ki, bəzən insanlarımız bunun fərqinə varmırlar. Həkimlər nəinki xəstələrin bu yolu seçməsinə yardım etməli, əksinə, vəziyyəti onlara izah etməlidirlər. Bax, problem budur".

Billurə Yunus