15 yaşlı Rüqəyyanın ayağa qalxmaq üçün dəstəyinizə ehtiyacı var - FOTO

Ağır xəstəlikdən əziyyət çəkən 15 yaşlı Rüqəyya Hüseynlinin sağalmaq üçün dəstəyinizə ehtiyacı var.

Ölkə.Az xəbər verir ki, yeniyetmə xeyirxah insanlara müraciət edərək, dəstək istəyib:

"Arzularım var. Ali məktəbə hazırlaşmaq, gələcəyimi indidən planlaşdırmaq istəyirəm, amma möhlətim çatacaqmı bilmirəm. Hələ ki xəstəliklə mübarizə aparıram. Valideynlərimi hıçqırıqlara yox, uğur göz yaşlarına boğmaq istəyirəm. Tək bildiyim odur ki, mənim ağrılarıma, onların ümidsizliklərinə son qoymağa Allahın və mənə yardım etmək istəyənlərin gücü çatar", - o deyib.

R.Hüseynlinin atası Şücayət bəy saytımıza açıqlamasında müalicə üçün təxminən 15 min manat lazım olduğunu söyləyib:

"Böyük prosedurlardan demək olar ki, keçmişik. Rüqəyya 5 dəfə əməliyyat olunub. Bundan sonra 4 seans kimyaterapiyası qalıb. Müalicə üçün təxminən 15 min manata yaxın pul lazımdır.
Həkimlər deyir ki, müalicəsinə də davam etsək, yaxşı olacaq. Sadəcə olaraq maddi sıxıntılarımız var, çatdıra bilmirik. Keçən ilin avqustundan Türkiyədəyik. Dövlət xəstəxanasındayıq. Çox bahadır.  Övladımın xəstəliyi üzə çıxana qədər maşın alverilə məşğul idim. Sadəcə olaraq bu müalicə ərəfəsində işləyə bilmədim. 3 övladım var. Böyük qızım İstanbulda universitet tələbəsidir. Tibb üzrə oxuyurdu. O da həm maddi vəziyyətlə, həm də bacısının xəstəliyi ilə əlaqədar təhsilini dondurub Rüqəyyanın yanında qalır. Kiçik oğlum isə 5 yaşındadır. 

Xeyirxah insanlardan balama dəstək olmalarını xahiş edirəm", - deyə ata əlavə edib.

Qeyd edək ki, R.Hüseynli limfoma sisteminin xərçəngindən əziyyət çəkir. o ötən ilin avqustundan etibarən Türkiyədə Ankara Universitetinin Cebeci xəstəxanasında müalicə alır.

Kömək etmək istəyənlər üçün kart hesabı: Leo Bank - 4098 5844 7111 0930
Əlaqə: +994 55 898 55 55