Çirkab suların "Ceyranbatan"a axıdılması iddialarına RƏSMİ REAKSİYA - VİDEO

Kanalizasiya sularının Ceyranbatan su anbarına axıdıldığı iddia edilir.

Ölkə.Az xəbər verir ki, bu barədə Xırdalan ərazisində yaşayan vətəndaşlardan biri çəkdiyi videoda danışıb.

Kanalizasiyanın daşıb ətrafa tökdüldüyünü deyən vətəndaş vəziyyətlə əlaqədar "Azərsu"ya dəfələrlə şikayət etdiklərini deyib:

"Gəldilər, turba qoydular, arx qazdılar. Bu yolla kanalizasiya suları Ceyranbatan su anbarına tökülür. Aidiyyəti və səlahiyyətli orqanlar buna heç bir reaksiya vermir. Yağış yağanda burada kanalizasiya qaynayıb tökülür".

***

“Azərsu” ASC-nin sözçüsü Anar Cəbrayıllı məsələ ilə Ölkə.Az-ın sorğusuna cavab olaraq bildirib ki, deyilənlər həqiqəti əks etdirmir:

"Su çox strateji məhsuldur və buna çox həssas yanaşırıq. Ərazidəki çirkab sularının gölə heç bir aidiyyəti yoxdur. Göllə suyun töküldüyü yer arasında böyük bir torpaq bənd var. Yəni çirkab sularının gölə qarışma ehtimalı yoxdur. Su arxla gedir və oradakı stansiya vasitəsilə Xırdalanın çirkab su xətlərinə ötürülür. Bu gün Bakının böyük bir hissəsi Ceyranbatan su anbarındakı sudan içir. Bu cür qaralama kampaniyalarına yol vermək olmaz", - deyə o əlavə edib.

Billurə