TikTok Azərbaycanda iki milyondan çox videonu silib

TikTok platformanın İcma Qaydalarını pozan məzmunu müəyyən edərək onları silib.

Ölkə.Az xəbər verir ki, ən son İcma Təlimatlarının İcra Hesabatlarına əsasən, 2023-cü ilin dördüncü rübündə dünya üzrə 176 461 963 video İcma Qaydalarının pozulması səbəbindən aradan qaldırılıb. Bu, rübdə TikTok tərəfindən silinən ən yüksək video sayıdır.

Ləğv edilən videoların 96,7%-i proaktiv şəkildə silinib. Proaktiv silinmə videonun xəbər verilməzdən əvvəl müəyyən edilməsi və silinməsi deməkdir.

Videoların 89,9%-i yayımlandıqdan sonra 24 saat ərzində aradan qaldırılıb.

8 012 732 canlı yayım qanun pozuntularına görə dayandırılıb.

Eyni müddət ərzində Azərbaycanda 903 041 video İcma Qaydalarının pozulması səbəbindən silinib. Bu, 2023-cü ilin istənilən rübündə silinmiş videoların ən yüksək sayıdır.

Silinmiş videoların ümumi sayının 98%-i platforma tərəfindən proaktiv şəkildə silinib.

Videoların 95,8%-i yayımlandıqdan sonra ilk 24 saat ərzində silinib.

Ümumilikdə, 2023-cü il ərzində Azərbaycanda İcma Qaydalarını pozan 2 071 243 video silinib.

TikTok azyaşlı istifadəçilər kimi həssas qrupa xüsusi diqqət yetirir. 13 və daha yuxarı yaşlı istifadəçilər üçün platformadır və hər bir yeni istifadəçiyə tam doğum tarixi tələb olunan qeydiyyat forması təqdim olunur. Platformanın moderator komandası hesabın 13 yaşından kiçik istifadəçiyə aid ola biləcəyini göstərən əlamətləri aşkar etmək üçün təlim keçib. Təhlükəsizlik qrupu hesabın uşağa aid olduğuna inanarsa, o, bloklanacaq. TikTok, sahiblərinin 13 yaşdan kiçik ola biləcəyi üçün silinən hesabların sayını açıqlayan ilk böyük platforma oldu. Belə ki, 2023-cü ildə dünya üzrə 13 yaşdan kiçik 76 484 236 istifadəçi hesabı silinib.