Bu səbəbdən güclü yanğınlar olur - Ekspertdən TƏKLİF

Bütün iş sahələrində olduğu kimi, xidmət sahəsində də əməyinin mühafizəsi və texniki təhlükəsizlik qaydalarına riayət edilməlidir. Riayət edilmədiyi halda sözü gedən hadisələrin  tez-tez baş verməsi qaçılmaz olur. Çox təəssüf ki, son dönəmlərdə yanğın hadisələri çoxalmağa başlayıb. Xüsusilə xidmət sahəsində yanğın təhlükəsizliyi qaydalarına riayət edilmir və kobud şəkildə pozulur. Bunun nəticəsi olaraq da böyük yanğınlar baş verir.

Bu sözləri Ölkə.Az-a açıqlamasında texniki təhlükəsizlik üzrə ekspert Xəzər Rüstəmov deyib. 

"Bir çox hallarda insan xəsarət alması halları olmasa da, əmlaklara ciddi zərərlər dəyir. 
Yanğın təhlükəsizliyi təmin etmək üçün, ölkəmizdə "Yanğın Təhlükəsizliyi Qaydaları" hazırlanıb. 
Həmin qaydaların ilk 3 bəndində qeyd edir ki, bu qaydaların tələblərinə riayət edilməsi təşkilatı hüquqi formasından və mülkiyyət növündən asılı olmayaraq, bütün dövlət hakimiyyəti və yerli özünüidarəetmə orqanları, təşkilatlar, müəssisələr, birliklər, digər hüquqi şəxslər, onların vəzifəli şəxsləri Azərbaycan Respublikası vətəndaşları, xarici vətəndaşlar, vətəndaşlığı olmayan şəxslər (sonradan vətəndaşlar) üçün məcburidir. Yanğın təhlükəsizliyi təmin edilərkən qaydalarla bərabər, standartlar, tikinti norma və qaydaları, texnoloji layihələşdirmə normaları, həmçinin müəyyən edilmiş qaydada təsdiq olunmuş digər normativ sənədlər rəhbər tutulmalıdır. Hər bir müəssisədə yanğın zamanı insanların təhlükəsizliyi təmin edilməli, həmçinin həmin obyekt üçün yanğın təhlükəsizliyi tədbirləri işlənib hazırlanmalıdır", - deyə o bildirib.

Ekspertin sözlərinə görə, müəssisədə rəhbər şəxsin daxili əmriylə yanğın təhlükəsizliyindən məsul şəxs təyin edilməli, yanğın söndürən dəstələr yaradılmalıdır. Həmin işçilər, ilkin və cari təlimatlandırılmalardan keçirilməlidir: 

"Bundan başqa, işçilər yerli və beynəlxalq qanunvericiliyə uyğun olaraq yanğın təhlükəsizliyi təlimatında iştirak etməli, yanğın zamanı davranış qaydalarını öyrənməli və daha sonra işə buraxılmalıdır". 

O vurğulayıb ki, tullantıların idarə edilməsi düzgün aparılmalıdır: "Xüsusən yana bilən materiallar təhlükəsiz şəkildə yığılmalı və ərazidən uzaqlaşdırılmalıdır". 

"Alışqan, partlaya bilən və yana bilən mayelər xüsusi ayrılmış yerlərdə saxlanılmalıdır", - deyən X.Rüstəmov qeyd edib ki, siqaret çəkmək üçün xüsusi yerlər ayırılmalı və daim nəzarətdə saxlanılmalıdır

"Müəssisə daxilində qaydalara uyğun şəkildə yanğın söndürən vasitələr olmalıdır. Həmin vasitələr yerindən asılı olaraq, baş verə biləcək yanğın növünə uyğun şəkildə tənzimlənməlidir. 
Əfsuslar olsun ki, günümüzdə yuxarıda qeyd etdiyimiz qaydalara riayət edən və bunlari tətbiq edən müəssisələrin sayı azdır. 

Xüsusilə xidmət sahəsində vəziyyət ürəkaçan deyil. İstər satış sahəsi olsun, istər restoranlar, istərsə də səhiyyə sistemində yanğın təhlükəsizliyi qaydalarına demək olar riayət olunmur. 
Bu formada yanaşmaların da nəticəsi olaraq bu sahələrdə tez-tez yanğın hadisələrinin baş verdiyini görürük", - deyə mütəxəssis əlavə edib.