Lüks həyatı, qalmaqallı açıqlamaları ilə gündəm olan Cavanşir Məmmədov ölümü haqqında nələr demişdi? - VİDEO
Ötən həftələrdə yaddaqalan hadisələrindən biri də Əməkdar artist Cavanşir Məmmədovun qəflətən vəfat etməsi idi.
Onun vəfatı çoxları üçün gözlənilməz oldu. Bir gün əvvəl toyda mahnılar ifa edən müğənninin ölümünə səbəb isə ürəktutması idi. Məlumata görə, onun ürəyində 4 stend olub.
Müğənnini yaxından tanıyanlar deyir ki, Əməkdar artistin evini yıxan stres olub.
Ölkə.Az Cavanşir Məmmədovla bağlı faktları bir araya toplayıb.
Əməkdar artist açıqlamaları ilə daim gündəmdə olsa da, onun haqqında ensiklopedik məlumat çox azdır.
Cavanşir Məmmədov 1954-cü ildə musiqiçi ailəsində anadan olub. Atası - Əməkdar artist İrşad Məmmədov dəf çalan olub.
Cavanşir Məmmədov bir zamanlar qarmon ifaçısı olub. Özünün dediyinə görə, 1973-cü ildən qarmonla toylara gedib.
1983-cü ildən oxumağa başlayıb, eyni zamanda 4 il qarmonla öz-özünü müşayiət edib.
1987-ci ildən isə qarmonu kənara qoyub müğənniliyə davam edib.
O, Xalq artisti Flora Kərimovanın dayısı oğludur.
Cavanşir Məmmədov hesab edirdi ki, indiki dövrdə oxumaq qarmon çalmaqdan çox-çox asandır:
"İndi oxumağı o qədər ucuzlaşdırıblar ki, hər ailədə bir müğənni var. Kimi dindirirsən, oxuyur. İndi oxumaq gündəlik yeyib-içmək kimi bir şey olub. Kimin ürəyi nə vaxt istəyir, oxuyur. Özü də soruşan yoxdur ki, niyə oxuyursan?"
Cavanşir bəy, həm seçilən geyim tərzi, həm bahalı maşınları, həm də açıqlamaları ilə tez-tez gündəmə gəlirdi.
Hər zaman lüks həyat tərzi ilə müzakirə olunan ifaçı özü də 1988-ci ildən 2020-ci ilə qədər yaxşı pul qazandığını deyirdi.
“Kiminsə pulunu saymıram. Həmişə yaxşı imkanım olub. Övladlarıma təhsil vermişəm, evlər almışam, maşın həvəskarı idim deyə, maşınlar almışam. Hazırda Nizami küçəsində iki evim var. 1988-ci ildən bəri hər şeyimi dəyişmişəm, evimi, maşınımı, bircə arvadımdan başqa”.
Sözssüz ki, Cavanşir Məmmədovla bağlı ən yaddaqalan məqamlardan biri sənətçinin özünü türkiyəli müğənni İbrahim Tatlısəslə müqayisə etməsi idi. Onun "İbrahim Tatlısısəsdən nəyim əskikdir" çıxışına sosial şəbəkə istifadəçilərindən birinin verdiyi "başının gülləsi" cavabı uzun müddət danışılmışdı.
Maraqlıdır ki, daha sonra Əməkdar artist özü də bu ifadəni səsləndirib. O, "İbrahimdən fərqli cəhətim odur ki, mənim başımın gülləsi hələ vurulmayıb" demişdi.
Tanınmış sənətçinin siqaret çəkən şəxsə müraciətlə "yaxşı edirsən, amma düz etmirsən" sözləri də dillərə düşmüşdü.
Əməkdar artistin təəccübləndirən açıqlamalarından biri də ona sui-qəsd edilməsi barədə dedikləri idi. Müğənni bildirib ki, illər əvvəl onu zəhərləyərək öldürmək istəyiblər.
Yaxınlarının dediyinə görə, Cavanşir Məmmədovun açıqlamalarının qalmaqala səbəb olması, onun fikrini düzgün ifadə etməməsi ilə əlaqəli olub.
Dəfələrlə ölüm barədə çıxışlar edən sənətçi bu yaxınlarda vəsiyyəti ilə diqqət çəkmişdi. O, verilişlərin birində atası kimi kostyumda dəfn edilmək istədiyini söyləmişdi.
Müğənni hətta 5 il əvvəl yası üçün bir mollaya beh verdiyini demişdi.
Əməkdar artist son olaraq xanımının ondan əvvəl ölməsini istədiyini bildirib.
"Xanımım məndən tez ölsün, sonra mən ölüm. Məsafə çox olmasın. Onu özüm dəfn etməliyəm. Təbii ki, qismət olsa. Allahın işinə qarışmaq olmaz, kimə nə yazıbsa, o olacaq".
Sağlığında Cavanşir Məmmədov haqqında gedən müzakirələr ölümündən sonra da bitmək bilmir. Prodüser Tarix Əliyev müğənninin yasına gəlməyən aparıcıları sosial şəbəkələrdə kəskin tənqid edib:
"Dünən bir daha şahidi oldum ki, çalış ölmə. Cavanşir müəllimin getdiyi ve reytinq verdiyi verilişlərin heç birinin aparıcıları onunla vidalaşmağa gəlməmişdi. TikTok-da Cavanşir müəllimin danışdığı hissələri paylaşıb verlişlərinizi reklam edənlər, harada idiniz?", deyə o yazıb.
Maraqlıdır ki, müğənni daha öncə bu barədə də çıxış edib. İfaçı daha əvvəl öləndə yasına ancaq ona yaxın insanların gəlməsini istədiyini demişdi.
“Yas yerinə mərhuma yaxın insanlar gəlməlidir. Əmioğlu, dayıoğlu, əmiqızının gəlməsinə gərək yoxdur. Tökülüşüb yasa gəlirlər. Həmin o yas yerində bir dənə araq çatmır, hamı yeyir-içir, noğuldan atır ağzına başlayır söhbətə ki, “Filan müğənnini kim saxlayır? Filan müğənni kimlə görüşür?”. Molla görür ki, yas xor akapellasına bənzəyir, orada öz iradını insanlara bildirir”.
Billurə
