Yeni trend uşaqların şəxsiyyətini alçaldır, travmadır - Həyəcan təbili
Son zamanlar sosial şəbəkələrdə yeni trend yaranıb. Bir sıra valideynlər körpə uşaqlarını küçədə zibil yeşiklərinin yanına qoyaraq videoya çəkirlər. Daha sonra isə həmin görüntüləri sosial şəbəkələrdə paylaşaraq "gələcəkdə səni zibillikdən tapmışıq deyib zarafat etmək üçün çəkdiyimiz video" başlığı ilə paylaşırlar.
Bu cür "zarafata" gülənlərlə yanaşı, valideynlərin davranışını düzgün hesab etməyənlər də az deyil.
Mövzu ilə bağlı Ölkə.Az-a danışan psixoloq Leyla İsmayılova hesab edir ki, valideynlərin bu hərəkəti uşaqlarda gerçək travmalara səbəb ola bilər:
"Bu trendin çox məsuliyyətsiz yanaşma olduğunu düşünürəm. Uşağın həssas və güvən duyğusunun inkişaf etdiyi dönəmdə onları ciddiyə almamaq, onları qorxutmaq, narahat etmək heç də qəbul edilən bir zarafat deyil. Bu cür zarafatlar uşaqların şəxsiyyətinə zərər verir, onların güvənli bağ qurmasına mane olur və duyğusal olaraq çatışmazlıq yaratma təhlükəsi var. Gerçək olmasa belə, uşaqda gerçəkmiş kimi travma yarada bilər".
Psixoloqun sözlərinə görə, valideynlərin "zarafat" adlandırdığı situasiya kimlərinsə gerçək hekayəsidir:
"Ən önəmlisi isə həqiqətən də bunu yaşayan başqa bir uşağın travmatik hekayəsini şüurlu halda zarafat obyekti olaraq istifadə etmək, onların üzüntüsünə gülmək onları aşağılamaq, özünəinamını zədələməkdir. Bu cür paylaşımlar keçmişində bu vəziyyəti yaşayan biri üçün eyni travmatik hadisəni canlandırmasına yol açır".
L.İsmayılova bildirib ki, belə davranışlar övladlığa uşaq götürən ailələrə hörmətsiz yanaşmaqdır:
"Övladlığa götürmək ciddi, önəmli və həssas bir prosesdir. Bunu zarafata çevirmək o ailələrdə emosional olaraq çətinlik və narahatlıq olmasına təkan verə bilər. Eyni zamanda da bu prosesə çox hörmətsizcə bir yanaşma olar. Belə zaraftalardan mütləq qaçmaq lazımdır.
Belə davranaraq gələcək üçün bu cür zarafatları edə biləcək potensialda uşaqlar hazırlayırıq. Unutmamalıyıq ki, uşaqlar bizim güzgümüzdür. Gələcəkdə narazı olduğunuz davranışları uşaqlarda görməmək üçün o davranışlardan əvvəlcə biz uzaq durmalıyıq. Uşaqların duyğusal sağlamlığı çox önəmlidir və bunun üçün uşaqlar sevildiklərini, qəbul edildiklərini, dəyər gördüklərini hiss etməlidirlər, tərk edildiklərini deyil".
Billurə Yunus
