Məktəblilər arasında “Zəfər tarixi” III Esse Olimpiadası”nın keçirilməsi elan edilib

Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin dəstəyi ilə Bakı İnsan Hüquqları Məktəbi İctimai Birliyi “Məktəblilər arasında “Zəfər tarixi” III Esse Olimpiadası”nın təşkilini və keçirilməsini elan edir.

Ötən illərin iki Olimpiadası məktəblilərin, müəllimlərin və valideynlərin böyük marağına səbəb olduğundan hər il keçirilməsi nəzərdə tutulub.

Esse Olimpiadası Vətənə və Vətən tarixinə sevgi ilə yanaşı, uşaqlarda yazı və fikirlərini yazılı şəklində ifadə etmək səriştələrini inkişaf etdirir. 

Bu barədə QHT-lərə Dövlət Dəstəyi Agentliyi, Bakı İnsan Hüquqları Məktəbi İB-dən bildirilib.

"Nəzərə alsaq ki, məktəblərdə yazı və yaradıcılıq səriştələri, mütaliə zəif inkişaf edir (məktəblərdə test üslubuna üstünlük verilir) bu Olimpiadanın əhəmiyyəti olduqca böyükdür uşaqların inkişafında.

Çalışaq uşaqları faydalı və inkişaflarına dəstək olan müsabiqələrə fəal cəlb edək. Odur ki, dəyərli həmkarlarımızdan və valideynlərdən xahiş olunur ki, bu Olimpiadaya çoxsaylı uşaqların cəlb olunmasına dəstək olsunlar.

Ötən Olimpiadanın bütün iştirakçılarına Sertifikatlar yaxın günlərdə təqdim olunacaq, odur ki, hörmətli valideynlərə səbirli və anlayışlı olduqları üçün təşəkkür edirik.

Hər kəsə, ələlxüsus əziz məktəblilərə uğurlar arzu edirik!

Olimpiadada iştirak şərtləri:

1. İstənilən ümumtəhsil müəssisəsinin 7,8,9,10 və 11 sinif şagirdləri 12 vərəqlik dəftərdə Zəfər tarixinə həsr olunmuş, həcmi minimum 3 vərəqdən maksimum 6 vərəqədək (6 və 12 səhifə) ibarət olan Esseni yazmalı və həmin Esse dəftərini (şagirdin adı, soyadı, ata adı, məktəbi, sinfi və əlaqə tel.nömrəsi dəftərin ilk səhifəsində göstərmək şərti ilə) skan edərək  [email protected]  elektron ünvanına göndərməlidirlər.

2. Essenin məzmunu 44 günlük II Qarabağ savaşını və Qarabağda aparılan quruculuq işlərini əhatə etməlidir. Bu parametrlərə uyğun olan mövzuların seçimi sərbəstdir.

3. Plagiat (köçürmə) xarakterli Esselər müsabiqəyə buraxılmır, hər şagirdin öz zehni məhsulu qəbul olunur. 

4. Esselərin son təqdimetmə tarixi 15.06.2024-cü il  saat 24.00-dır.

5. Skanetmə mümkün olmadıqda Esseni smartfonla səliqəli şəkildə çəkib PDF formatında emeyılımıza göndərmək olar, lakin göndərilən material çap olunub, rahat oxunmalıdır.

6. Skan olunmuş dəftər müsabiqənin sonunadək saxlanılmalıdır, 30 nəfər finalçı müəyyən edildikdə (ötən müsabiqədə 20 finalçı nəzərdə tutulmuşdur, bu dəfə 30-dək artırılıb) dəftərlə birlikdə final müsabiqəsinə dəvət olunacaqlar.

7.Münsiflər Heyəti tərəfindən gizli səsvermə nəticəsində 3,0 finalçı müəyyən olunacaq.
Qeyd Qiymətləndirmə 10 bal üzrə aparılacaq.

8. Finalçılara qiymətli hədiyyələr və I, II, III dərəcəli Diplomlar təqdim olunacaq.

9. Bütün iştirakçılara rəsmi imzalı və möhürlü Sertifikatlar təqdim olunacaq.

10.Finalçılar Qazilərin, Şəhid ailələrinin, tanınmış ziyalıların, Qeyri-Hökumət Təşkilatlarına Dövlət Dəstəyi Agentliyinin və qeyri-hökumət təşkilatları nümayəndələri ilə görüşəcəklər.

Bütün ümumtəhsil müəssisələri rəhbərlərini, müəllim və valideynləri, əziz şagirdlərimizi bu kimi mühüm və önəmli müsabiqədə iştirak etməyə dəvət edirik.

Allah Şəhidlərimizə rəhmət eləsin, ruhları qarşında baş əyirik!", - deyə məlumatda bildirilir.