Qohum evliliyindən doğulacaq xəstə uşaq ailəyə də, dövlətə də yükdür - Tanınmış həkim

"Bəri başdan deyim ki, qan qohumu olan şəxslərlə evlənməklə bağlı qadağanın qəbul olunacağına inamım azdır. Elə deputatlar arasında da yekdil fikir görünmür".

Ölkə.Az xəbər verir ki, bunu tanınmış pediatr Vaqif Qarayev deyib. O bildirib ki, birinci dərəcəli qan qohumlarından (əmi, xala, bibi, dayı uşaqları)doğulacaq uşaqlarda irsi-genetik xəstəliklərin olma ehtimalı yüksəkdir:

"İrsi metabolik pozğunluqlar, ağır ürək qüsurları, talassemiya, əqli və fiziki məhdudiyyətlər və s. tez-tez rast gəlinir. Ətrafınızda belə uşaqlar varsa, qohum evlilik səbəbi ilə maraqlanın. Bu barədə uzun danışıb həyəcan, təşviş yaratmaq istəmirəm.

Təbabət qadağa qoymur, amma ciddi fəsadların olacağı barədə proqnoz verir. Ona görə məsuliyyət qalır valideynlərin boynundadır. Bəzən deyirlər ki, arada sevgi-məhəbbət filan olur. Onların bu hüququnu pozmaq olmaz, razılaşaq, amma ağır əqli və fiziki problemlərlə doğulacaq uşağın da normal yaşamaq hüququ var. Bu uşaqlar ailəyə, dövlətə, cəmiyyətə, səhiyyə strukturlarına ağır yükdür. Valideynlərin çəkdiyi mənəvi-psixoloji iztirabdan danışmasaq yaxşıdır".

V.Qarayevin fikrincə, qohumla evlənmək istəyənlər əvvəlcədən genetik müayinədən keçsələr yaxşıdır:

"Heç evlənməsələr daha yaxşıdır!

Qanunun qəbul ediləcəyinə inanmıram. Çünki düşüncəmiz dəyişməsə, heç bir inzibati qadağa bunun qarşısını ala bilməz. Bu adət (olmaz olsun!) əsrlərdir xalqımızın düşüncəsində pərçimlənib.

Sağlam olun ki, dünyaya sağlam uşaq gətirəsiniz!" - o əlavə edib.

Billurə Yunus