"Ərlə arvad bir-birinin telefonuna baxa bilməz, şübhələnirsə, xüsusi proqramlar var"
Cəmiyyətimizdə vaxtaşırı müzakirə olunan mövzulardan biri də telefon və sosial şəbəkələrdir.
"Ərlə arvad bir-birinin telefona baxmalıdır?" sualı hələ də aktuallığını qorumaqdadır. İnsanlarımız arasında bu sualın cavabı birmənalı deyil.
Mövzu ilə bağlı Ölkə.Az-a danışan Yeni Yazarlar və Sənətçilər İctimai Birliyinin sədri, Mir Cəlal Paşayev adına Milli Virtual Kitabxananın təsisçisi, Prezident təqaüdçüsü, yazıçı-kulturoloq Aydın Xan Əbilov bildirib ki, telefon şəxsin xüsusi sahəsidir:
"Müasir dövrdə telefon və yaxud smartfon sadəcə danışıq üçün bir vasitə deyil, həm də özündə çox böyük funksiyaları ehtiva edən, insanın sosial şəbəkələrdəki həyatını özündə birləşdirən bir cihazdır. Ona görə də ailədə ər, ya da arvadın öz yeri varsa, onlara aid olan hər hansı bir avadanlıq, yaxud sirr onun özəl hadisəsi sayılır və kiminsə müdaxilə etməsi düzgün deyil.
Ər və ya arvad bir-birindən şübhələnirsə, bu, başqa məsələdir. Bunun üçün xüsusi tətbiqlər var və smartfona yazdırmaqla öz həyat yoldaşını izləyə və yaxud hara getməsi haqqında məlumatlar əldə edə bilər.
Nəzərə almaq lazımdır ki, smartfonda biz müxtəlif bank kartları ilə bağlı tətbiqlər, o cümlədən də dost-tanışlarımızla şəkillərimizi saxlayırıq. Bəzən bu fotolar həm də intim olur. Belə informasiyalar niyə başqasının əlinə keçməlidir?
Əgər ər, arvad və yaxud uşaq bunu gizlədirsə, ya da hesab edirsə ki, bu qapalı olmalıdır, deməli, həmin telefona heç kim girməməlidir. Ümumiyyətlə, bu, Azərbaycan cəmiyyətində bir etiket qaydası kimi oturuşmalıdır. Əgər tərəflər bir-birlərinin bütün sirlərini bilməli olduqlarını düşünürsə, bu yanaşma düzgün deyil".
Fotoda Aydın Xan Əbilov
Bununla belə kulturoloq hesab edir ki, ailəli şəxslər vəziyyəti nəzərə almalıdırlar:
"Heç kimə təzyiq göstərib onun smartfonunu, sosial şəbəkə şifrələrini və yaxud hesablarında olan məlumatları ala bilməz. Əgər alırsa, qanun qarşısında cavabdehdir. Bu ər də ola bilər, arvad da.
Amma xüsusilə ailə içərisində olanlar çalışmalıdırlar ki, bir-birlərinə qarşı səmimi olsunlar. Öz hərəkətləri, həyat tərzi və çəkdirdikləri fotolarla gələcəkdə həm özünə, həm ailələrinə problem yaratmasınlar.
Eyni zamanda tərəflər bir-birinin telefonuna baxırsa, səmimiyyətdən, məhəbbətdən, sayğıdan irəli gəlməlidir.
Əgər siz evlənmisinizsə, nəzərə almalısınız ki, sizin nikahınız həm göydə, həm yerdə bağlanıb. Çalışmalısınız ki, bir-birinizə sayğı ilə münasibət qurasınız. Əks təqdirdə problemlər ortaya çıxa bilər".
Billurə
