4 övladını küçədə qoyub gedən ana haqqında Dövlət Komitəsindən AÇIQLAMA

Sosial şəbəkə və xəbər portallarında "Bakıda ana dörd uşağını küçəyə atıb" başlıqlı məlumat dərhal aidiyyəti dövlət qurumları tərəfindən nəzarətə götürülərək araşdırılıb.

Ölkə.Az xəbər verir ki, bunu Ailə, Qadın və Uşaq Problemləri üzrə Dövlət Komitəsinin sözçüsü Teymur Mərdanoğlu deyib. O, qadının kimliyinin müəyyən olunduğunu bildirib:

"Öncə uşaqlar müayinə və müalicə üçün xəstəxanaya yerləşdiriliblər. Qadın isə ərazi üzrə polis əməkdaşları tərəfindən saxlanılıb. Onun övladlarından imtina etməsinin səbəbləri araşdırılır" - məlumatda deyilir.

Qeyd edək ki, bundan əvvəl Azərbaycan Uşaqlar Birliyi-Uşaq Sığınacağı Reinteqrasiya Mərkəzinin sədri Kəmalə Ağazadə Azərbaycanda ananın 4 övladını parkda qoyub getdiyini bildirib. Üçü 14, 5 və 4 yaşlarında, biri isə 5-6 aylıq olan 4 uşaq polislər tərəfindən tapılıb və sığınacağa yerləşdirilib.

K.Ağazadə qeyd edib ki, böyük qız anasının sevgilisi ilə kirayə axtarmaq məqsədilə getdiyini və geri qayıtmadığını bildirib.

Billurə