Azərbaycanlı tələbə nüfuzlu universitetdə 500 min dollarlıq təqaüd qazandı
Azərbaycanlı tələbə ABŞ-nin nüfuzlu universitetlərindən birinə qəbul olub.
Ölkə.Az xəbər verir ki, Toğrul Ağbabalı ABŞ-nin Nyu York Dövlət Universitetində maliyyə ixtisası üzrə $500.000 dəyərində tam təqaüd proqramını qazanıb.
Toğrul Ağbabalı 2018-ci ildə Bakı şəhəri 43 saylı liseyi fərqlənmə diplomu ilə bitirib.
O, həmin il İstanbul Texniki Universitetinin Nyu York Dövlət Universiteti ilə ortaq ikili bakalavriat programının Menecment fakültəsinə daxil olub.
İstanbul Texniki Universitetindəki iki illik təhsil müddətini fakultə birincisi kimi adı Yüksək Şərəf Kitabına daxil edilməklə bitirib, maksimum təhsil təqaüdü əldə etməklə Nyu York Dövlət Universitetində təhsilini davam etdirib.
O, buradakı təhsil dövründə Universitetin Yatırım Fondunun (Hawk Investment Fund) böyük analitiki vəzifəsini icra edib, ətraf mühitin qorunması üzrə Strateji Planlaşdırma və Qiymətləndirmə Şurasının universitet üzrə “səfir”lərindən biri kimi fəaliyyət göstərib.
T.Ağbabalı ikili bakalavriat proqramını fakültə birincisi olaraq bitirib.
Daha sonra o, 2022-ci ildə Corc Vaşinqton Universitetinin Maliyyə üzrə magistr programına yüksək təqaüdlə daxil olub.
Bu dövrdə Toğrul həm də maliyyə dərslərininin tədrisində professor köməkçisi kimi çalışıb, araşdırma assistenti olaraq seçilən tələbələrdən olub.
O, Beynəlxalq Valyuta Fondu və Dünya Bankının 2022-ci il payız və 2023-cü il yazında Vaşinqtonda keçirilən iclaslarında iştirak etmək hüququ qazanan yeganə azərbaycanlı tələbə olub.
Corc Vaşinqton Universiteti Azərbaycanlı tələblər birliyinin vitse-prezidentidir. Magistr təhsilini 2024-cü ildə 4 mümkündən 4 bal toplayaraq bitirdiyinə görə “Charles and Florence Diehl” adına təsis olunan xüsusi sertifikata və pul mükafatına həmin il universitet üzrə layiq görülən yeganə məzun olub.
Magistr təhsilini bitirdikdən sonra ABŞ-ın nüfuzlu universitetləri olan Nyu York Dövlət Universiteti, Alabama Dövlət Universiteti və Florida Beynəlxalq Universitetlərindən tam təqaüdlə doktorantura təhsil almağa dəvət alıb.
Hazırda təhsilini maliyyə üzrə doktorantura səviyyəsində Nyu York Dövlət Universitetində davam etdirir.
Ölkə.Az
