Şəhidlərin əziz xatirəsinə Quran ziyafəti - FOTO
Türkiyə Səfirliyinin Din Xidmətləri Müşavirliyi, Dini Qurumlarla İş üzrə Dövlət Komitəsi və Qafqaz Müsəlmanları İdarəsinin birgə təşkilatçılığıyla Bakı şəhəri Şəhidlər məscidində bütün şəhidlərimizin əziz xatirəsinə həsr olunan, artıq ənənəvi olaraq təşkil edilən Qurani-Kərim ziyafəti keçirilib.
Ölkə.Az xəbər verir ki, şəhid ailələri, şəhid yaxınları və qazilərimizin də iştirak etdiyi tədbiri giriş sözü ilə Türkiyə Səfirliyinin Din Xidmətləri Müşaviri İhsan Açık açıq elan edib. O, çıxışında bu kimi tədbirin şəhidlərimizə vəfa borcu olduğunu, şəhidlərimizin bizim baş tacımız olduğunu vurğulayıb. İhsan Açık şəhidlərin heç vaxt unudulmayacağını qeyd edərək onlara hədiyyələrin ən gözəli olan Qurani-Kərim hədiyyə etmək üçün belə bir tədbir təşkil edilib.
Dini müşavir Qafqaz İslam Ordusu şəhidlərini, Qarabağ şəhidlərini, Xocalı şəhidlərini, 20 yanvar şəhidlərini, 44 günlük Vətən Müharibəsi şəhidlərini, ümumilikdə vətənimizin azadlığı uğrunda canlarını fəda edən bütün şəhidlərimizi rəhmət və ehtiramla yad edib. Həmçinin bu yolda sağlamlığını itirən qəhrəman qazilərimizi də hörmət və ehtiramla yad edərək onlara Allahdan şəfa diləyib.
Daha sonra Dini Qurumlarla İş Üzrə Dövlət Komitəsinin şöbə müdiri Cahandar Əlifzadə öz çıxışında qardaş Türkiyədən gələn qonaqlara və tədbir təşkilatçılarına təşəkkürünü bildirib.
Daha sonra çıxış edən Qafqaz Müsəlmanları İdarəsi Səbail rayonu üzrə bölgə Qazısı, Şəhidlər məscidinin imamı Mirzahid Qənbərov öz çıxışında tədbir iştirakçılarına və qardaş Türkiyədən gələn qonaqlara öz təşəkkürünü bildirib.
Sonda tədbir iştirakçılarına şəhidlərimiz adına ehsan süfrəsi açılıb və ehsanlar verilib.
Mürtəza
Ölkə.Az
