“İş adamı da olsa, onları maliyyələşdirməməlidir”

Ucuz qiymətə, hay-küylə, şillə-təpiklə diqqət çəkməyə çalışan reklamlar geniş vüsət almağa başlayıb. Əvvəllər belə görüntüləri tənqid edənlərin bəziləri də artıq həmin reklamın iştirakçısına çevrilib.

Kiçik paltar mağazasından tutmuş, şəbəkə formasında fəaliyyət göstərən bəzi müəssisələrə qədər bir çox yerlərin reklamında qəribə davranışları ilə seçilən şəxslər çəkilirlər və burada hər hansı bir reklam startegiyasından söhbət gedə bilməz.
Bu da bayağı reklamların çoxalmasına və trendə çevrilməsinə səbəb olur.

Mövzu ilə bağlı Ölkə.Az-a danışan PR mütəxəssisi Afət Yaqubova hesab edir ki, bunun əsas səbəbi sifarişçilərin ucuz qiymət arxasınca qaçmasından qaynaqlanır.

“Ucuza qaçırlar və özlərini əziyyətə salmaq, yaradıcı işlər ortaya çıxarmaq istəmirlər. Ona görə də bu cür olur. Və yaxud da məhsulu reklama çıxaranda yaxşı araşdırma ilə, hədəf kütləsini tanımaqla etmirlər deyə bu vəziyyət yaranır. Sosial şəbəkələr, influnserlik bu cür problemlidir. O demək deyil ki, camaatın ən çox baxdığı adam sənin məhsulunu yaxşı satacaq və ya yaradıcı, cəzbedici reklam verəcək. Bu üsulla adam məhsulunu sata bilirmi? Maraqlı olan budur.

Cəmiyyətin səviyyəsi belə reklamların ortaya çıxmasını diktə edir. Balaca bir marketin bu cür etməsi, baxış toplaması normaldır. Sadəcə, sosial mediadır deyə, hamı görür”.

Mütəxəssisin sözlərinə görə, problem böyük şirkətlərin yaradıcı reklamlarının olmamasındadır:

“Onların fonunda bunlar bizim gözümüzə çox görünür. Sadəcə yayılır deyə bizə elə gəlir ki, “partlatdı”, camaat gedib oradan məhsul aldı. Amma biz bilmirik ki, satışa təsir göstərir, ya yox? Bu cür reklamın satışa təsir göstərməsi ilə bağlı böyük şübhələrim var. Sadəcə tanıtmağa istiqamətlənib. Heç öz məhsulu da deyil, adam özünü tanıtmağa həvəslənib.
Məsələn, sosial şəbəkələrdə yayılan bu cür videolarda yerə atılan geyimi, ayaqqabını siz gedib alarsınızmı? Başqaları da alacaqmı? Məsələ budur.
Camaatın belə bayağı şeylərə maraq göstərməsi, sifarişçinin ucuz reklam arxasıyca qaçması, reklam bazarına da təsir edir. Həqiqi sənət əsəri, əvvəlki reklamlar daha ortaya çıxmır.
Sifarişçi fikirləşir ki, ucuz qiymətə hamının baxdığı bir şey edə bilərəm. Qarşılarına qısamüddətli hədəflər qoyurlar. Sifarişçilərdə də günah çoxdur. Normalda sifarişçi belələrinin bazarda ayaq açmasına imkan verməməlidir. İş adamı da olsa, cəmiyyət qarşısında məsuliyyət daşımalı, belə şeyləri maliyyələşdirməməlidir”, – o söyləyib.

Billurə Yunus