Bakıda qırılan ağac budağı piyadalar üçün təhlükə saçır - Açıqlama/Foto
Bakının Nərimanov rayonu ərazisində qırılan ağac budağı piyadalar və nəqliyyat vasitələri üçün təhlükə saçır.
Ölkə.Az xəbər verir ki, rayonun Səməd Vurğun küçəsində, Azərbaycan Tibb Universitetinin Tədris Stomatoloji Klinikasının qarşısında yerəşən ağacın bir budağı qırılıb və yaxınlıqdakı digər ağaca ilişərək asılı qalıb.
Ağac hər an səki ilə hərəkət edən piyadalar və ərazidə saxlayan nəqliyyat vasitələrinin üzərinə düşə bilər.
Foto ötən gün axşam saatlarında çəkilib. Gün ərzində havanın küləkli olmadığını nəzərə alsaq, deməli, qırılmış budaq azı 1 sutkadır həmin vəziyyətdə qalıb.
Məsələ ilə bağlı Nərimanov Rayon İcra Hakimiyyəti ilə əlaqə saxladıq. Qurumdan Ölkə.Az-a bildirildi ki, keçənin həmin hissəsi Nəsimi rayonu ərazisinə düşür.
Vəziyyətlə bağlı Nəsimi Rayon İcra Hakimiyyətindən Ölkə.Az-a bildirilib ki, artıq aidiyyəti üzrə məlumat verilib və qırılan budaq ərazidən dərhal götürüləcək.
Həmçinin o da əlavə edilib ki, ərazidəki ağaclara qulluq göstərilməsi və budanması ilə bağlı icra hakimiyyətindən yaşıllaşdırma idarəsinə tapşırıq verilib.
Billurə
