“Təhsildə həmrəylik” adlı qış düşərgəsi təşkil edilib - FOTO
Azərbaycan Təhsil İşçiləri Azad Həmkarlar İttifaqı (ATİAHİ) ölkəmizin təhsil sistemində fəaliyyət göstərən dövlət və özəl təhsil müəssisələrində çalışan işçilərin əmək, sosial, iqtisadi hüquqları və qanuni mənafelərinin müdafiəsi, eyni zamanda İttifaq üzvlərinin sosial rifahının artırılması, asudə vaxtlarının daha səmərəli təşkili, onların təcrübə mübadiləsi və peşəkar inkişafını dəstəkləməkdir.
“Ölkə.az” xəbər verir ki, bu məqsədlə 30 dekabr tarixindən ATİAHİ` tərəfindən Dünya Azərbaycanlılarının Həmrəyliyi Günü və Yeni İl münasibətilə “Təhsildə həmrəylik” adlı qış düşərgəsi təşkil edilib. Düşərgə 300-ə yaxın təhsil işçisini əhatə edib.
Xaçmaz rayonunun Xuray kəndində yerləşən "Təhsil" İstirahət Mərkəzində baş tutan düşərgədə ilk dəfə olaraq respublikamızın ucqar rayonlarında çalışan müəllimlərin, eləcə də təhsil sahəsində çalışan şəhid və qazi ailələrinin üzvləri iştirak ediblər.
Tədbiri giriş sözü ilə Azərbaycan Təhsil İşçiləri Azad Həmkarlar İttifaqı Respublika Komitəsi sədrinin birinci müavini Tehranağa Abdullayev açaraq ATİAHİ Respublika Komitəsinin sədri Araz Paşayevin salamlarını və Dünya Azərbaycanlılarının Həmrəyliyi Günü və Yeni İl münasibətilə təbriklərini çatdırıb. T.Abdullayev düşərgə iştirakşılarına beş gün ərzində xoş istirahət və gələcək fəaliyyətlərində uğurlar arzulayıb.
5 gün davam edəcək bu tədbirdə təhsil işçiləri və onların ailə üzvləri üçün maraqlı proqramlar, təlimlər və əyləncəli intellektual yarışlar keçiriləcək.
300-ə yaxın təhsil işçisinin iştirak etdiyi düşərgə çərçivəsində istirahət mərkəzində “Xatirə bağı” salınacaq. 44 günlük Vətən müharibəsinə xatirə olaraq 44 ədəd ağac əkiləcək. Məqsəd ətraf mühitin qorunması, ekoloji tərbiyəni gücləndirmək, təbiətə töhfə verməklə yanaşı, təhsil işçiləri arasında ekoloji həmrəyliyin təməlinin qurulmasıdır.
Məlumat üçün bildirək ki, düşərgə 3 yanvar tarixinədək davam edəcək.
