Hacı Şahindən məscid olayına "don geyindirənlərə" cavab: "Aləmə car çəkənlər..."

"Ölkə.Az" xəbər verir ki, bunu "Məşədi Dadaş" məscidinin axundu, ilahiyyatçı Hacı Şahin Həsənli deyib. O bu gün məsciddə cümə xütbəsi zamanı anidən yüksək səslə din xadiminin ünvanına nalayiq ifadələr səsləndirən şəxs barədə müzakirələrə aydınlıq gətirib.

Şahin Həsənlinin sözlərinə görə, məscidin ətrafında olan polis işçiləri onu bölməyə aparıb və araşdırmadan sonra məlum olub ki, bu şəxs Gəncə psixiatriya xəstəxanasında müalicə olunub və psixi xəstə kimi qeydiyyatdadır: "Bir sıra naməlum kimliklər arasında gizlənən, kimlikləri bizə bəlli olan şəxslər və xaricdən idarə olunan bəzi səhifələr həmişəki kimi tələsərək, həmin şəxsi “xalqın etiraz səsi”, “mücahid” kimi təqdim edərək ruhi xəstə olan bu şəxsin hərəkətini “siyasi aksiya” kimi təqdim etdilər. Onun “yoxa çıxdığını” bildirərək, böyük sevinclə “xalqın etiraz səsinin boğulduğunu” aləmə car çəkməyə çalışdılar. Təbii ki, bu adam yoxa çıxmayıb, hal-hazırda bölmədədir və müalicə aldığı xəstəxanaya qaytarılacaq". 

İlahiyyatçı əlavə edib ki, axşam saatlarında bu şəxsin qardaşı məscidə gəlib və qardaşının əqli qüsurlu olduğunu, uzun müddət müalicə olunduğunu bildirib və üzrxahlıq edib 

"Dostlara bildirmək istəyirəm ki, narahatlığa heç bir əsas yoxdur. Allah hamımıza agahlıq versin!", - o deyib.