Zəlzələ: qədər, “Allahın bəlası”, yoxsa…?

Türkiyədə baş verən, xeyli sayda dağıntı və tələfata səbəb olan güclü zəlzələlərin dini tərəfi insanlar arasında müzakirələrə səbəb olub.

Belə ki, 40 mindən çox insanın ölümünü insanların məsuliyyətsizliyi ilə əlaqələndirənlərlə yanaşı, bunun qədər-qismət olduğunu düşünənlər də az deyil. Ölümlərin təbii fəlakət nəticəsində baş verdiyini deyərək bunu Allahdan gələn bəla kimi qiymətləndirənlər də var.

Mövzu ilə bağlı Ölkə.Az-a danışan “Məşədi Dadaş” məscidinin imam-camaatı, Qafqaz Müsəlmanları İdarəsinin (QMİ) nümayəndəsi Hacı Şahin Həsənli bildirib ki, Allahın qəzavü-qədəri insanların öz əməllərindən asılıdır:

“Yəni biz mütləq ağlımızın buyurduğuna əsasən yaşamalı, həyatımızı qorumağa çalışmalıyıq. Düşünərək yaşamalıyıq və nəticələrini də görməliyik. Bu gün Türkiyədə baş verən zəlzələdə insanları günahlandırmaq, “onlara Allahın bəlası demək” kökündən yanlışdır. Allahın hikməti çox geniş bir mövzudur. Biz Allahın hikmətini belə rahat müəyyənləşdirə bilmərik. Burada əsas məsələ baş verən hadisədən nəticə çıxarmaqdır.

Yəni hər bir hadisədə Allahın bəndələrinə çatdıracağı bir söz var. İnsanlar əslində onun üzərində düşünməlidir. Bu gün biz daha çox yardımlaşma üzərində düşünməliyik. Fikirləşməliyik ki, bu zəlzələ insanları birləşdirməyə xidmət edir, bizə dünyanın fani olduğunu çatdırır. Yəni bir anın içərisində insan ömrü boyu əldə etdiyi sərvəti, elementar imkanları itirə bilər. Bütün bunlar yaşadığımız dünyanın qaydalarıdır və biz bu məsələlərə hazır olmalıyıq. Fikir verirsinizsə, bu zəlzələ hətta siyasi baxımdan bir-birilə yaxşı münasibəti olmayan ölkələri də yaxınlaşdırdı, xalqları birləşdirdi. Bu, əslində, o deməkdir ki, hər hansı bir bəladan, çətinlikdən müsbət dərslər də almaq olar.

Misal üçün, Azərbaycan xalqı bu hadisədə özünü ən müsbət yöndən göstərə bildi. Bir millət kimi səfərbər olduq. Daha çox bu mövzuların üzərində düşünməliyik. Eyni zamanda da həmin binaların müəyyən qaydalara uyğun tikilməsi, bütün bəlalardan çıxarılacaq nəticələrdir. Amma bunun xalqın, millətin günahlarının nəticəsi olduğunu demək asan və yanlış yoldur. Ümumiyyətlə, biz insanları ittiham edə bilmərik. Günaha qaldıqda dünyanın müxtəlif yerlərində günahlar baş verir. Bu o demək deyil ki, ancaq orada yaşayan əhali günahkardır, dünyanın digər insanları günahsızdır. Yəni bunu belə bəsit formada təhlil etməməliyik. Bu hadisələrdən daha geniş mənada ibrət almağa çalışmalıyıq”.

Hacı Şahin baş verənlərin qiyamət əlaməti kimi şərh edilməsinə də münasibət bildirib:

“Qurani-Kərimdə qeyd olunur ki, qiyamət haqqında sizə az şey məlumdur. Yəni qiyamətin nə vaxt baş verəcəyi insanlara bildirilməyib. Ümumi olaraq təbii fəlakətlər, hansısa qeyri-təbii hadisələr insanlar başına yalnız ibrət üçün gələ bilər. Amma bundan çıxış edib “qiyamət günü”, “dünyanın sonu yaxınlaşır” demək yanlışdır. Çünki bu kimi təbii fəlakətlər tarixin müxtəlif dövlərində olub.

Dinimizə əsasən, qiyamətdən öncə dünyanın xilaskarının gələcəyi müjdəsi verilib. Yəni dünya sona çatmamış, ədalət bərqərar olunacaq. Yəni Həzrəti İsanın, həzrəti Mehdinin zühuru haqqında hədislər var. Ona görə də bu gün dünyanın sonu haqqında danışmaq kökündən yanlışdır. Bu, heç bir Quran ayəsinə, hədisə əsaslanmır. İnsanların öz həyat prioritetlərini yenidən nəzərdən keçirməsi üçün fürsətdir. Amma dünyanın sonu haqqında danışmaq tezdir və bu barədə bizə heç bir məlumat verilməyib. Ona görə də buna istinad edib insanlar içərisində qorxu, vahimə yaratmaq kökündən səhvdir”, - deyə QMİ rəsmisi söyləyib.

Billurə Yunus