Yeni seçilən Şeyx Hacı Şahinin məzarını ziyarət edib, Qarabağda olub – Eksklüziv müsahibə

Ölkə.Az Gürcüstan Müsəlmanları İdarəsinin Şeyxi Hacı Faiq Nəbiyevdən Azərbaycana etdiyi səfərlə bağlı eksklüziv müsahibə alıb.

Hacı, sizi salamlayırıq, Azərbaycana etdiyiniz səfərlə bağlı təəssüratlarınızı öyrənmək istərdik.

- Aleykum salam. Müsahibə üçün sizə minnətdarlığımı bildirirəm. Səfərlə bağlı qeyd edim ki, QMİ-nin sədri, Şeyxülislam Allahşükür Paşazadənin dəvətilə GMİ-nin Ali Şurasının üzvləri Hacı Rahid Kərimov, Hacı Namiq Hüseynov və GMİ əməkdaşı Oktay İsayevdən ibarət nümayəndə heyəti ilə səfər etdik. Səfər çox yüksək səviyyədə hazırlanmışdı. QMİ sədri ilə görüşümüz keçirildi, görüşdə iki ölkənin dini qurumlarının fəaliyyəti haqqında fikir mübadiləsi aparıldı. Azərbaycanın din xadimləri ilə tanışlığımız oldu. Bibiheybət Ziyarətgahını, Hacı Şahin Həsənlinin qəbrini ziyarət etdik. Fürsətdən istifadə edərək Şeyxülislam Hacı Allahşükür Paşazadə başda olmaqla, bu səfərin reallaşmasında rolu olan hər kəsə öz minnətdarlığımı bildirirəm. 

- Gürcüstan və Azərbaycanın dini qurumları arasında əlaqələr hansı səviyyədədir?

- Ölkələrimiz arasında olan dostluq və qardaşlıq üzərində qurulan Gürcüstan və Azərbaycanın dini qurumları qarşılıqlı hörmət göstərərək münasibəti gücləndirməkdədir. 

Qeyd etmək istəyirəm ki, Gürcüstan Müsəlmanları İdarəsinin Şeyxi kimi bu günə qədər olan münasibətləri gələcəkdə də qoruyub saxlayaraq irəli getməsi üçün çalışacağam. 

- Bildiyimiz qədər siz Dini Qurumlarla İş Üzrə Dövltə Komitəsinin sədri Mübariz Qurbanlı ilə də görüşünüz oldu. Bu haqda nə deyə bilərsiniz?

- Bəli. Dini Qurumlarla İş Üzrə Dövlət Komitəsinin sədri Mübariz Qurbanlı ilə də görüşümüz oldu. Şeyx seçilməyim münasibətilə təbrik etdi. Gürcüstanla münasibətlərin inkişaf tempindən məmnunluğunu bildirdi. Gürcüstanın Dini Məsələlər üzrə Dövlət Agentliyinin rəhbəri Zaza Vaşakmadzenin Azərbaycana, habelə Azərbaycan nümayəndə heyətinin ötən il Gürcüstana etdiyi səfərləri həmin əlaqələrin canlanmasına təkan verən amil kimi qiymətləndirdi. Mən də ölkələrimiz arasında siyasi və dini sahədəki əlaqələrin daha da inkişaf edəcəyinə ümid etdiyimi, bu əlaqələr və əməkdaşlıqların daha da yaxşılaşması üçün töhfə verəcəyimi bildirdim.

Gürcüstan və Azərbaycan arasındakı dostluq münasibətlərinin özünü bütün sahələrdə göstərdiyini və daha da inkişaf edəcəyinə ümid etdiyimi qeyd etdim.

- Başqa hansı görüşləriniz baş tutdu?

- Azərbaycanın Diasporla İş Üzrə Dövlət Komitəsində Fuad Muradov, Bakı Beynəlxalq Multikulturalizm Mərkəzinin icraçı direktoru Rəvan Həsənov, Bakıda İlahiyyat İnstitutunda rektor Aqil Şirinovla görüşümüz oldu. Bütün görüşlərimiz səmərəli və faydalı olduğunu deyə bilərəm.

- GMİ-nin nümayəndə heyətinin Azərbaycana səfərində yadda qalan hansı məqamlar oldu?

- Bu səfər çox yüksək səviyyədə təşkil olunmuşdu. Xüsusilə işğaldan azad olunan bölgələrə səfəri qeyd etmək istəyirəm. Şuşada Yuxarı Gövhər Ağa məscidini ziyarət etməyimiz, orada namaz qılıb Quran oxumağımız çox yaddaqalan məqamlar idi. Bundan başqa, Bibiheybət Ziyarətgahına etdiyimiz ziyarətin çox mənəvi ab-havası var idi. Nümayəndə heyətilə birlikdə biz Hacı Şahin Həsənlinin də qəbrini ziyarət edərək onun ruhuna dualar oxuduq. Onu da qeyd edim ki, QMİ-də görüş zamanı mərhum Hacı Şahin Həsənlidən danışdım. Gürcüstan müsəlmanlarının onun vəfatından kədərləndiyini, Gürcüstan müsəlmanları tərəfindən onun anım mərasiminin təşkil edildiyini bildirdim.

- Ümumiyyətlə, Gürcüstan dövlətinin azərbaycanlı müsəlman icmasına münasibəti haqda nə deyə bilərsiniz?

- Gürcüstan Dövləti millətindən asılı olmayaraq müsəlmanlara çox yaxşı münasibət bəsləyir. Onların problemlərini daim diqqət mərkəzində saxlayır. Dövlətimiz BGMİ-yə maddi dəstəyi verir və bizim istər milli, istər dini bayramlarımızda tədbirlərin keçirilməsi, yer ayrılması kimi təqdirəlayiq işləri var. Bundan başqa dövlətin rəsmi təqvimində dini bayramlar, matəm günləri qeyd edilib. Bizim idarəmiz (BGMİ) müsəlmanlar və dövlət arasında bir körpü rolunu oynayır. BGMİ bir çox layihələrini, həmçinin həll edilməli işləri idarənin ali dini şurası, rayon və kənd axunları, Gürcüstanın Dini Məsələlər üzrə Dövlət Agentliyi, həmçinin digər dövlət qurumları və ya yerli idarəetmə müəssisələri ilə birlikdə görür.   

- Müsahibəyə görə təşəkkür edirik Hacı.

- Mən sizə təşəkkür edirəm. Redaksiya kollektivinizə uğurlar arzulayıram.

Ölkə.Az