"Dini təhsilsizlik cəmiyyət üçün böyük fəlakətdir" – Deputat
“Prezident İlham Əliyev Milli Məclisin ilk iclasında çıxışı zamanı dövlətimiz və cəmiyyətimiz üçün 2 təhdiddən danışdı. Bunun biri hərbi, ikincisi isə ideoloji xarakterli təhdid idi. Biz bir sıra ölkələrin təcrübəsində görürük ki, məhz ideoloji təhdid sonradan hərbi təhdidlə əvəzlənir və dövlət üçün daha təhlükəli nəticələrə aparıb çıxarır”.
Ölkə.Az xəbər verir ki, bunu Milli Məclisin İctimai birliklər və dini qurumlar komitəsi sədrinin müavini Sahib Alıyev “Müasir dini təhsil modelləri ənənələr və qlobal çağırışlar kontekstində” respublika elmi-praktik konfransda çıxışı zamanı deyib. O bildirib ki, təhdidlər qarşısında ən böyük sipər Ulu öndərin azərbaycançılığıdır:
“İdeoloji təhid isə çox hallarda ən azından 80% özəlliklə bizim regionda, Yaxın Şərqdə və Böyük Qafqazda din üzərindən gerçəkləşdirilir. Onun nəyə aparıb çıxardığını biz Suriyanın, İraqın təcrübəsində gördük. Yəni məzhəbçiliyin sonradan dövləti necə parçaladığını və necə yırtıcı güclərin yeminə çevrildiyini gördük. Bu gün də həmin təhdidlər davam edir və bunun qarşısında ümumiyyətlə tədrisdə də, ideologiyada da, əməldə də ən böyük sipər Ulu öndərin azərbaycançılığıdır. İdologiyada azərbaycançılıq, dində azərbaycançılıq və əməldə azərbaycançılıq.
Əməldə azərbaycançılığın nə ilə nəticələndiyini biz gördük. Böyük yırtıcı güclərin qarşı çıxmalarına rəğmən Azərbaycan öz torpaqlarını azad etdi. Çünki yəhudisi də, xristianı da, katoliki də, provaslavı da, müsəlmanı da bu torpaqlar uğrunda çiyin-çiyinə vuruşdular. Hansı konfessiyanın təmsilçisi olmasından asılı olmayaraq onların hər birinə biz şəhid deyirik və hər birinin başımız üzərində yerləri var”.
S.Alıyev xüsusi vurğulayıb ki, ilk dəfədir ki, müsəlman dünyasında məhz Azərbaycan İlahiyyat İnstitutunda heç bir məzhəbçiliyə fərq qoymadan islam dini öyrədilir:
“Eyni zamanda dinşünaslar da dinlərə bu baxımdan yanaşırlar.
Avropada məzhəb müharibələri başa çatandan sonra baxdıq ki, həmin Avropadan Şərqə missionerlər gəldi. Onlar bu məzhəbçiliyin nə dərəcədə təhlükəli olduğunu dərk edib bir araya gələndən Yaxın Şərqdə məzhəbçilik yaymağa başladılar. Müsəlman dünyası da parçalanmağa o zamandan başladı. Ona görə də çağdaş dövrdə biz məzhəbçiliyin hər bir növünü qətiyyətlə rədd etməliyik.
Açığını deyim ki, qanunvericilik səviyyəsində də bununla bağlı müəyyən tədbirlər görülməlidir. Biz bəzən məzhəbçiliyin açıq təbliğinə qarşı konkret mövqe ortaya qoyulduğunu görürük, amma məzhəbçiliyin gizli təbliği də gedir.
Fikirləşirəm ki, gələcəkdə qanunvericilik sənədlərində bununla bağlı müəyyən düzəlişlərə, addımlara ehtiyac olacaq”.
Deputat “Dini təhsil lazımdırmı?” sualının əbədi olduğunu deyib və bu sualı cavablandırıb:
“Bəli, dini təhsil lazımdır, ən azı ona görə ki, dini təhsilsizlik cəmiyyət üçün böyük fəlakətdir, bu xurafat deməkdir. Bunun nəyə yol açdığını biz görürük, amma dini təhsil tərbiyə ilə elmlə balanslı şəkildə aparılmalıdır.
Bəzən fikirləşirəm ki, ABŞ kimi nəhəng dövlətin görün nə qədər Nobel mükafatçısı, ağıl mərkəzləri var, amma niyə blə nataraz hərəkətlər edir? Niyə dünyada bu dərəcədə sevilmir? Elmi hərbi potensialı ola bilər, amma yumşaq güclə sərt gücün kombinasiyasını reallaşdıra bilmir. Çünki bünövrə problemidir. Ağıllı güclə yumşaq gücün kombinasiyasını ilk dəfə Müzəffər Ali baş komandanımızın liderliyi altında reallaşdıraraq torpaqlarını azad etməklə məhz Azərbaycan bacardı. Bununla fəxr edirəm”.
Billurə Yunus
