Macarıstan Avropa İttifaqını təxribatda ittiham etdi

Budapeşt Avropa İttifaqını "Cənub axını" layihəsinə qarşı təxribat törətməkdə ittiham edib.

Ölkə.Az "Komsomolskaya pravda" qəzetinə istinadən xəbər verdiyinə görə, Macarıstanın baş naziri Viktor Orban hesab edir ki, rəsmi Brüssel məqsədyönlü şəkildə "Cənub axını" layihəsini təxirə salmağa çalışıb.

Radiolardan birinə verdiyi müsahibədə baş nazir qeyd edib ki, Aİ bu proqramın sona çatdırılmaması üçün dayanmadan işləyib.

Orban Rusiya ilə saziş bağlamaqla Macarıstanın enerji təminatına nail olmaq istəyirdi, lakin bu addım qərb ölkələrinin hökümətləri tərəfindən tənqid olunmuşdu. Nazirlər kabineti rəhbərinin sözlərinə görə, Macarıstan qaz təchizatının digər variantları üzərində düşünür və onlar arasında Azərbaycandan qazın alınması da vardır.

Xatırladaq ki, dekabrın 1-də Rusiya Federasiyasının prezidenti Vladimir Putin "Cənub axını" qaz kəmərinin tikintisini davam etdirilməyəcəyini bəyan etmişdi. Sonradan energetika naziri Aleksandr Novak bu addımı Avropa İttifaqının mövqeyilə bağlı olduğunu izah etmişdi.

Rəşid Mustafazadə

Ölkə.Az