"Snouden qalmaqalı" ilə bağlı yekun qərar verildi

Snoudenin ifşa etdiyi izləmə metodunu qanuni hesab ediblər.

Ölkə.Az TASS agentliyinə istinadən xəbər verir ki, Böyük Britaniyada Edvard Snouden tərəfindən ifşa olunmuş izləmə metodlarının qanuniliyi təsdiq olunub. Tribunalın qərarına görə, elektron sistemlər İnsan hüquqları üzrə Avropa konvensiyasına zidd deyillər.

Reuters agentliyinin yaydığı məlumata görə, bu qərarı xüsusi xidmət orqanları üzərində nəzarətlə məşğul olan İstintaq tribunalı qəbul edib.

"Biz qərara gəldik ki, indiki dövrdə bu sistemlər konvensiya maddələrinə zidd deyillər. İzlemə texnologiyaları sürətlə inkişaf edir. Bu qaçılmazdır və bir çox maraqların toqquşmasına səbəb olur. Məhz Snoudenin ifşası insanlarda elə təəssürat yaratmışdılar, sanki qanun bəzi hallarda kəşfiyyat xidmətlərinə sərhədsiz səlahiyyətlər verir və onlar istədiklərini edə bilərlər. Bu belə deyil", - deyə İstintaq tribunalının qərarında bildirilir.

Bir müddət əvvəl bəzi beynəlxalq hüquq müdafiə təşkilatları, o cümlədən Liberty, Amnesty International və Privacy International faktla bağlı etiraz etmişdilər. Onlarn fikrincə, Snoudenin ifşaedici hərəkətləri bir daha göstərdi ki, ABŞ və Böyük Britaniyanın hüquq-mühafizə orqanları insan hüquqlarını pozaraq, sosial şəbəkə istifadəçiləri haqqında məlumat toplayırlar.

Rəşid Mustafazadə

Ölkə.Az