Almaniya "Cənub axını" layihəsinin davam etdiriləcəyinə ümid edir

"Cənub axını" Cənubi Avropanın qaz təchizatının təmin olunması üçün mühüm addım ola bilərdi"

Ölkə.Az DW media şirkətinə istinadən xəbər verdiyinə görə, Almaniyanın iqtisadiyyat və energetika naziri Ziqmar Qabriel "Cənub axını" layihəsinin tikintisinin davam etdiriləcəyinə ümidini ifadə edib. Onun fikrincə, bu layihə, Rusiya hökumətinin imtina etməsinə baxmayaraq, gələcəkdə bərpa ediləcək.

"Bütövlükdə Avropa üçün layihənin tamamilə bitməsi yaxşı olardı. "Cənub axını" layihəsinin tikintisi Cənubi Avropanın qaz təchizatının təmin olunması üçün mühüm addım ola bilərdi", - deyə Ziqmar Qabriel Brüsseldə enegetika nazirlərinin görüşündə çıxış edərkən bildirib.

Qabriel layihənin tikilməsi məsələsi nə vaxtsa Aİ, Rusiya və Ukraynda arasında münasibətlər normallaşdıqdan sonra yenidən müzakirəyə çıxarılacağına ümidini ifadə edib. Moskvanın qərarını uğursuz adlandıran nazir, bunun faciə olmadığını da dilə gətirib.

Xatırladaq ki, dekabrın 1-də Vladimir Putin "Cənub axını" layihəsinin dayandırıldığını bəyan etmişdi. Sözügedən qərar qaz kəmərinin tikintisi üçün Bolqarıstanın icazə verməməsi nəzərə alınaraq qəbul edilmişdi.

Rəşid Mustafazadə

Ölkə.Az