Moskvada İŞİD-çi qardaşlar saxlanıldı

“Ölkə.Az” xəbər verir ki, bu barədə Rusiya Daxili İşlər Nazirliyindən yerli mətbuata bildirilib. Qeyd edilib ki, saxlanılan şəxslər Şimali Qafqazdan gələnlərdir. Onların arasında iki qardaş Dağıstandan gəlib. Onlardan birinin 22, digərinin 19 yaşı var. Qardaşlar Moskvada yeni tikilməkdə olan çoxmərtəbəli binaların birinin kabinəsində qalırlarmış. Qardaşlar elə həmin tikintidə də çalışıblar.

Əməliyyat Federal Təhlükəsizlik Xidməti tərəfindən keçirilib. Terror aktına hazırlaşan şəxslər özlərini çox qəribə aparıblar. Yerli əhali onlardan şübhələnib və bu barədə polisə xəbər verib. Bildirilir ki, qardaşlar həmişə çox sakit görünüblər və heç kimlə münasibətdə olmayıblar.

Onların qaldığı otaqdan çoxlu partlayıcı və sursat tapılıb. Həmçinin qardaşların üstündən odlu silah və güllələr götürülüb. Saxlanılan şəxslər İŞİD terror təşkilatı ilə əlaqəli olduqlarını etiraf ediblər. Bildiriblər ki, Moskvada böyük terror aktı törətməyə hazırlaşıblar. Məlumatda onlarla birgə başqa neçə nəfərin saxlanıldığı isə bildirilmir. 

Ziya Səccad
Ölkə.Az