Kataloniyada kütləvi etiraz aksiyaları başlayıb

“Ölkə.Az” xəbər verir ki, təşkilatçılar aksiyaların davam edəcəyini bildiriblər. Vurğulanıb ki, Kataloniyaya təzyiqlərə son qoyulmayana qədər kütləvi etiraz aksiyaları davam edəcək.

Qeyd edək ki, oktyabrın 2-də səhər saatlarından başlanan aksiyadan sonra təşkilatçılar etirazçılara axşam evə getmələrini bildirmişdilər. Ən böyük hərəkət Barselonada, universitet yaxınlığında qeydə alınıb. Bura toplaşanların sayı digər ərazilərdəkilərdən çox olub. Gündüz saatlarında həmin əraziyə tələbələr toplaşmışdılar. Ərazidə avtomobillərin hərəkəti iflic vəziyyətinə düşmüşdü.

İspaniyanın Kataloniya əyaləti müstəqillik referendumu keçirib. Polis və seçicilərin üz-üzə gəldiyi yüzlərlə insanın yaralandığı referendumdan sonra Kataloniya prezidenti Puçdemon çıxış edərək müstəqil dövlət qurma haqqı qazandıqlarını bildirib. Səsvermədən iki gün sonra müstəqilliyin elan edilməsi gözlənilir. İspaniyanın Kataloniya muxtar bölgəsində keçirilən referendumda xalqın 90.09 faizi müstəqilliyin lehinə səs verib. Avropa İttifaqı Komissiyası isə Kataloniyada keçirilən müstəqillik referendumundan sonra açıqlama verib. Açıqlamada keçirilən referendumun qeyri-qanuni olduğu bildirilir.

Ziya Səccad
Ölkə.Az