İranda internet qadağası

Əvvəl İranda yalnız seçilmiş saytlar bağlanırdısa, bundan sonra vəziyyət daha da çətinləşəcək.

Ölkə.Az qafqazinfo-ya istinadən xəbər verir ki, sözügedən İslam ölkəsində hər bir internet istifadəçisini identifikasiya edə biləcək sistem hazırlanır.

“Yaxın gələcəkdə internetdən istifadə edən şəxslərin hamısı qeydə alınacaq. Və bu prosesdən sonra şəxsiyyətini bilmədiyimiz heç kim online ola bilməyəcək”-deyə İranın telekomunikasiya naziri Mahmud Vaezi bildirib.

Bu yolla yerli hökumət qanunsuz hesab etdiyi materialların əhali tərəfindən oxunmasının qarşısını almağa çalışır.

Bundan başqa, İran hökuməti “ağıllı” avtomatik filtrlar da hazırlamağı düşünür. Onların köməyi ilə şəbəkədəki istənilən “haram” materiala senzura qoyulacaq.

Sözügedən sistem 10 ay müddətində hazırlanıb təqdim edilməlidir.

Qeyd edək ki, hazırda İranda “Google”, “Youtube”, “Facebook”, “Twitter”, “Whatsapp” kimi sosial şəbəkə və saytlar blokdadır.

Ölkə.Az