Dini lider: "Müsəlmanlar üçün spirtli içki haram deyil"

"Bu fətvaya görə mən şəxsən cavabdehəm"

Ölkə.Az "The Daily Telegraph"-a istinadən xəbər verir ki, Avstraliyanın Sidney şəhərinin islam cəmiyyəti şəhər məscidlərindən birində fəaliyyət göstərən imamın bəyanatını tənqid edib. Belə ki, sözügedən imam müsəlmanların spirtli içkidən normada istifadə etməsini İslam qaydalarına zidd olmadığını bəyan edib.

Mustafa Rəşid adlı din xadımı bu bəyanatı ötən cümə günü Misir telekanallarından birinə müsahibə verərkən etmişdi. Onun sözlərinə görə, Quranda sərxoşluğa qadağa var, alkoqolə yox. Mustafa Rəşid bildirib ki, şərabın az miqdarda istifadəsi insanı sərxoş etməz və bu islam qaydalarında günah sayılmır.

"Bu fətvaya görə mən şəxsən cavabdehəm", - deyə avstraliyalı din xadimi bəyan edib.

Avstraliyada yaşayan müsəlman liderləri bu bəyanatı mühakimə edərək, din xadimini günah təbliğatçısı adlandırıblar. İsam cəmiyyətinin başçısı Keysar Trayd cavab olaraq bildirib ki, 1400 il əvvəl alkoqol müsəlmanlara tamamilə qadağan olunmuşdu.

"Yalnız əgər bir insan susuzluqdan və ya aclıqdan ölməklə üz-üzədirsə, sırf həyatını xilas etmək üçün spirtli içki qəbul edə bilər, lakin bu çox az hallarda rast gələ bilər", - deyə Trayd qeyd edib.

Rəşid Mustafazadə

Ölkə.Az