Çinin "Nobel" mükafatı bu şəxsə verildi

2011-ci ildə bu mükafat Putinə verilmişdi.

Ölkə.Az Rosbalt agentliyinə istinadən xəbər verir ki, Çin Xalq Respublikasının "Nobel"i adlandırılan Konfusi sülh mükafatı Kuba inqilabının lideri Fidel Kastroya verilib. Əfsanəvi siyasətçinin rəqibləri sırasında Cənubi Koreya prezidenti Pak Kın Xe və BMT-nin baş katibi Pan Qi Mun da var idi.

Təşkilat komitəsinin bəyanatına görə, Fidel Kastro hakimiyyətdə olduğu dövrdə beynəlxalq münaqişələrin nizamlanması üçün güc tətbiq etməyib və vəzifədən çıxdıqdan sonra da dünya liderləri və ictimai təşkilatlarla əlaqə saxlayıb. Bundan əlavə, komitə əməkdaşları Fidel Kastronun nüvə müharibəsinin qarşısının alınmasına verdiyi töhvələri yüksək qiymətləndiriblər.

Sözügedən mükafat 2010-cu ildə çinli iş adamı Lü Çjitsinin təşəbbüsü ilə təsis olunmuşdu. 2011-ci ildə Konfusi sülh mükafatı Rusiya prezidenti Vladimir Putinə, daha əvvəllər isə BMT-nin keçmiş baş katibi Kofi Annana, tayvanlı siyasətçi Lyan Çjan, çinli alim Yuan Lunpin və çan-buddizm xadimi Şi İçenə verilmişdi.

Rəşid Mustafazadə

Ölkə.Az