Lavrovla Kerri Yaxın Şərqdə vəziyyəti müzakirə ediblər

Suriyanın Hələb vilayətində hərbi qüvvələr hökumətə qarşı çıxan üsyançıların üzərinə doğru irəliləməyə başlayıb. SANA xəbər agentliyinin verdiyi məlumata görə, ötən gün, əsasən, Handarat şəhəri ətrafında tərəflər arasında güclü döyüşlər gedib. Ordu qüvvələri üsyançıların mövqelərini top atəşinə tutublar. Ordu rəhbərliyi qarşı tərəfdə döyüşən qüvvələr arasında əl-Qaidə terror təşkilatının bir qolu olan Nusra Cəbəhsinin də olduğunu məruzə edib.

Bəzi mənbələr, Suriya ordusuna isə, Hizbullah döyüşçülərinin dəstək olduğunu yazıblar.

Suriyada cərəyan edən döyüşlər Rusiyanın xarici işlər naziri Sergey Lavrov ilə amerikalı həmkarı Con Kerri arasında müzakirə mövzusu olub. Tərəflər İtaliyanın paytaxtı Romada əvvəlcədən planlaşdırılmamış görüşə qatılıblar.

Lavrov çıxışı zamanı, Suriya məsələsi ilə yanaşı, Yaxın Şərq və Ukrayna məsələlərinə də toxunub. Nazir qeyd edib ki, hazırda İsrail ilə Fələstin arasında yaşanan gərginliklə əlaqədar regionda sosial-iqtisadi vəziyyət daha da ağırlaşa bilər. “Bunun qarşısını almaq üçün görülə biləcək tədbirlərin müzakirə olunması mənim üçün maraqlıdır” - deyə Lavrov vurğulayıb.

Rusiya hökuməti Suriya böhranının aradan qaldırılması üçün təşəbbüsü ələ almağa çalışır. Rəsmi Moskva nümayəndələri bir müddət əvvəl Suriya prezidenti Bəşər Əsədlə görüşlər keçirmiş, ölkədəki vəziyyətə dair müzakirələr aparmışdı./Anspress/

Ölkə.Az