Rza Zərrab "şahid qoruma proqramı"ndan istifadə edəcək

ABŞ-da həbs edilərək məhkəməyə cəlb edilən iş adamı Rza Zərrab prokurorluqla razılaşaraq şahid qismində ifadə verir.

"Halkbank"ın baş direktorunun sabiq müavini Hakan Atillanın yeganə müttəhim olduğu məhkəmə işində "AKP"li sabiq nazir Zafer Çağlayan və "Halkbank"ın sabiq baş direktoru Süleyman Aslan da daxil olmaqla Türkiyədən bir çox insanın adı keçir. Rza Zərrab üç gündür ki, hakim qarşısında ifadə verir.

Bildirilir ki, Rza Zərrab "şahidi qoruma proqramı"na cəlb edilə bilər. Bunu isə ABŞ cənubi region federal prokurorluğu təklif edib.
Rza Zərrab fırıldaq, çirkli pulların yuyulması, embarqonu dağıtmaq kimi cinayətlərə görə 90 il həbs cəzasına məhkum edilə bilər. Ümumi olaraq 6 cinayətə görə ittiham edilən Zərrab həbsxanada içki və mobil telefon üçün rüşvət verdiyini etiraf edib.

Əgər "şahidi qoruma proqramı"na cəlb edilsə, adı dəyişdiriləcək və bu yeni ad ilə ABŞ-ın hansı həbsxanasın göndəriləcəyi gizli saxlanılacaq. 90 illik həbs cəzası isə kifayət qədər azaldılacaq.

Hikmət Həsənov
Ölkə.Az