Mixeil Saakaşvili həbs edildi

“Ölkə.Az” xəbər verir ki, bu barədə Ukrayna baş prokuroru Yuriy Lutsenko “Facebook” səhifəsində yazıb. Onun sözlərinə görə, M.Saakaşvili Kiyevdə həbs edilib.

“Mixeil Saakaşvili haqqında axtarışa verilmə barədə qərar çıxarılmışdı. Bu qərardan sonra ölkənin polis əməkdaşları onu həbs ediblər. Onu Kiyevdə mərkəzi küçələrin birində həbs ediblər. Mixeil Saakaşvili müvəqqəti saxlanma təcridxanasına yerləşdirilib”, - deyə Yuriy Lutsenko bildirib.

Qeyd edək ki, Gürcüstanda bir sıra cinayətlərdə ittiham olunan M. Saakaşvili 2015-ci ilin mayında Ukrayna vətəndaşlığı alıb və Odessa vilayətinin qubernatoru təyin edilib. 2016-cı ilin noyabrında isə qubernator postundan istefa verib və hakimiyyəti tənqid etməyə başlayıb. Ukrayna prezidenti Petr Poroşenko bu il iyulun 26-da, M. Saakaşvili ABŞ-da olarkən onu Ukrayna vətəndaşlığından məhrum edib. Ancaq M. Saakaşvili sentyabrın 10-da tərəfdarları ilə birlikdə Polşa sərhədindən Ukraynaya keçməyi bacarıb. Bu zaman Ukrayna təhlükəsizlik qüvvələrinin 22 əməkdaşı xəsarət alıb. Lvov polisi sərhədin qanunsuz keçmək və polisə müqavimət ittihamları ilə 15 ilə qədər azadlıqdan məhrumetməni nəzərdə tutan cinayət işi açılıb.

Ziya Səccad
Ölkə.Az