Suriyada ABŞ qırıcıları ruslara İŞİD-i bombalamağa icazə verməyib

Rusiya Hərbi Hava Qüvvələri Suriyada İŞİD terror təşkilatı üzvlərinin gizləndiyi əraziləri bombalamaq istəyərkən ABŞ-ın qırıcıları buna mane olub.

“Ölkə.Az” xəbər verir ki, bu barədə Rusiya müdafiə nazirliyinin rəsmisi general-mayor İqor Konaşenkov bildirib. Onun sözlərinə görə, ABŞ-ın qırıcıları rusların bombardımançı təyyarələrinə yaxın məsafədən uçduqları üçün əməliyyata mane olublar.

“Bizim “SU-25” təyyarələrimiz əməliyyat keçirərkən ABŞ-ın “F-22” qırıcıları buna mane olublar. Onlar bizim təyyarələrin yaxınlığından uçublar və zərbələr endirməyə imkan verməyiblər”, - deyə İqor Konaşenkov bildirib.

Bu açıqlamadan sonra Pentaqondan rəsmi cavab özünü çox gecikdirməyib. Bildirilib ki, rusların təyyarələri Amerika ordusunun nəzarət etdiyi ərazilərə yaxınlaşıblar. Bu səbəbdən də, ABŞ qırıcıları təhlükəli məntəqələrə giriş icazəsi olmayan rus təyyarələrini mühasirəyə alıblar.

Ziya Səccad
Ölkə.Az