Ermənistanda etiraz aksiyası başladı

Ermənistanda dramın dəyərsizləşməsi və bahalaşmaya qarşı etiraz aksiyaları başlayıb.

Ölkə.Az erməni mətbuatına istinadən xəbər verir ki, bu gün Ermənistanın paytaxtında onlarla insan hökumət binasının qarşısına toplaşaraq etiraz etməyə başlayıblar. Narazı kütlə 6 tələb irəli sürərək Ermənistan hökumətinin ayın 23-nə qədər bu şərtlərin yerinə yetirməsini tələb ediblər. Bildirilir ki, əks halda, əhali oliqarxların super marketlərini boykot edəcək.

Ermənistanda aksiya iştirakçıları zəruri istehlak mallarının və xidmətlərin qiymətlərinin böhrandan qabaqkı həddə endirilməsini,qazdoldurma stansiyalarında qazın qiymətinin aşağı salınmasını, vətəndaşların dollarla olan kredit borclarının yenidən hesablanmasını və bütün inhisarların aradan qaldırılaraq bazarın liberallaşdırılmasını tələb ediblər.

Qeyd edək ki, aksiyanın təşəbbüskarları bəyan ediblər ki, bu tələblər yerinə yetirilmədiyi halda, ölkədə sosial partlayışın baş verməsi təhlükəsi ola bilər.

Rəşid Mustafazadə

Ölkə.Az