Roqozin: "Kuba ABŞ-ın şifahi vədlərinə görə prinsiplərindən imtina etməyəcək"

Roqozin Raul Kastro ilə görüşüb.

Ölkə.Az "RİA Novosti" agentliyinə istinadən xəbər verir ki, Rusiyanın baş nazir müavini Dmitriy Roqozin Kubanın lideri Raul Kastro ilə görüşüb.

Kubanın paytaxtında keçirilən görüşdə tərəflər iki ölkə arasında iqtisadi və ticari əlaqələri, habelə beynəlxalq gündəmi müzakirə ediblər. Görüşün yekununa əsasən, Roqozin bəyan edib ki, Kuba ABŞ-ın vədlərindən sonra öz prinsiplərindən imtina etməyəcək.

"Kuba tərəfi öz pronsiplərindən imtina etmək fikrində deyil. Yəni, Kuba ABŞ-ın hələlik yalnız şifahi dialoqun bir hissəsi olan vədlərinin müqabilində prinsipial mövqeyindən imtina etməyəcək", - deyə nazir müavini qeyd edib.

Roqozin əlavə edib ki, blokadanın götürülməsinin əsas təşəbbüskarı Kuba yox, ABŞ olub.

Xatırladaq ki, bir müddət öncə Kuba hökuməti Rusiya şirkətlərinin adanın inkişafında iştirak edəcəyinə ümidini ifadə etmişdi. Nazirlər şurasının başçısı Rikardo Kabriqası bəyan etmişdi ki, iki ölkə arasında münasibətlər keyfiyyətcə yeni səviyyədədirlər.

Rəşid Mustafazadə

Ölkə.Az