Minskdə kritik görüş

Belarusun Xarici İşlər Nazirliyi Minskdə Ukraynada vəziyyətin nizama salması üzrə əlaqə qrupunun görüşünün keçiriləcəyi faktını təsdiq edib.

Ölkə.Az-ın anspress-ə istinadən verdiyi xəbərə görə, bu barədə Belarusun XİN-nin mətbuat katibi Dmitri Mironçik bildirib.

O deyib ki, əlaqə qrupunun danışıqları bu gün mətbuatın iştirakı olmadan baş tutacaq. Görüşün dəqiq saat neçədə və harda baş tutacağı barədə məlumat hələ yoxdur.

Minskdə Ukraynanın Donbass vilayətindəki vəziyyətlə bağlı danışıqların gündəliyi açıqlanıb. Üçtərəfli formatda keçiriləcək təmas qruplarının görüşü zamanı müzakirə olunacaq məsələlər haqda ATƏT nümayəndəsi Haydi Talyavini bildirib.

Məlum olub ki, görüş zamanı bütün tərəflərin atəşkəsə riayət etməsi, bütün tərəflərin ağır texnikanı geri çəkməsi, bütün tərəflər arasında girovların hamısının mübadiləsi və separatçıların nəzarətində olan ərazilərdə humanitar böhranın qarşısı almaq üçün həmin ərazilərə humanitar yardımın çatdırılması məsələləri müzakirə olunacaq.

"Donetsk Xalq Respublikası"nın nümayəndəsi Denis Puşilin bildirib ki, DNR dekabrın 24-26-da Minskdə əlaqə qrupunun üçtərəfli görüşündə iştirak edəcək.

Ukraynanın xarici işlər naziri Pavel Klimkin deyib ki, Ukrayna üçtərəfli əlaqə qrupu arasında keçiriləcək danışıqlara hazırlanır.

Xatırladaq, dekabrın 22-də Almaniyanın baş naziri Angela Merkel, Fransa, Ukrayna və Rusiya prezidentləri Fransua Olland, Petro Poroşenko və Vladimir Putin əlaqə qrupunun Minskdə dekabrın 24-26-da görüşü barədə razılığa gəliblər.

Ölkə.Az