Qəddafilərdən Sarkoziyə ittiham: “Bizdən pul alıb, bizi bombaladı”
“Ölkə.Az” xəbər verir ki, ittihama əsasən, Sarkozi 2006-cı ildə Qəddafidən 50 milyon avro rüşvət alıb. Qəddafinin oğlu isə bildirib ki, Sarkozi ilə gizli saziş imzalanıb. Bununla da Liviya lideri ölkəni iqtisadi blokadadan çıxarmaq istəyirdi.
Sarkozi saxlanıldıqdan sonra Liviyada gizlənən Seyf əl-İslam Qəddafi bildirib ki, bu sazişi təsdiq edən sənədlər var. Söhbət 2006-cı ilin payız aylarına aid səs yazısından gedir. Sarkozi seçkilərdən əvvəl Tripoliyə səfər etmişdi. Səs yazısı Liviya kəşfiyyatı tərəfindən edilib.
“Sarkozi bu barədə həqiqətləri danışmır. Adətən deyir ki, Qəddafi özü onunla yaxınlaşmaq istəyirdi. Amma əslində belə deyildi. Sarkozi maliyyə partnyoru axtarırdı və prezident seçilmək istəyirdi. Liviya hökuməti isə səxavəti ilə şöhrət tapmışdı”, - deyə ailənin vəkili Puççarelli bildirib.
Onun sözlərinə görə, Qəddafi oyuna qoşulur və sanksiyaların ləğvini tələb edir. Sarkozi bütün şərtlərlə razılaşır. Onun hakimiyyətinin ilk illərində Liviya və Fransa arasında yaxınlaşma oldu. Qəddafi iki dəfə Parisə səfər etdi və Versal yaxınlığında çadır qurdu. 2011-ci ildə isə hər şey dəyişdi. Liviyada baş qaldıran etirazlara NATO və Fransa hərbi müdaxilə etdi. Qəddafi öldürüldü. Qəddafinin zirehli maşın karvanı fransızlar tərəfindən bombalandı və üsyançılar liderlərini öldürdülər.
“Mən əminəm ki, Sarkozi amerikalıların işlədiyi planı həyata keçirdi. Onlar Yaxın Şərqdə xəritəni dəyişmək istəyirlər. Misir, Tunis və Liviya xarabaya çevrildi. Bu dövlətlər inkişaf mərhələsində olduqları üçün ABŞ-ın zəhləsi gedən ölkələr idilər. Sarkozi amerikan oyununda iştirak etdi”, - deyə vəkil bildirib.
Amma Liviyaya qarşı müharibə Avropada hamını razı salmırdı. Şimali Afrika ölkələrindəki problem miqrasiyaya yol açdı. 2007-ci ildən 2 milyondan çox afrikalı Avropa İttifaqına mühacirət etdi. Qəddafi dövründə bu mümkün deyildi. Liviya hökuməti hər vəchlə bunun qarşısını alırdı.
Qəddafinin tərəfdarları düşünür ki, Liviyada insanların ölümünə səbəb olan Sarkozi məhkəmə qarşısında cavab verməlidir.
“O, islamçı və cihadçı qruplaşmaları maliyyələşdirirdi. Bu qruplaşmalar üsyanda iştirak ediblər. Bu formalaşma bu gün də fəaliyyətdədir. Qəddafi rejiminin minlərlə məmurunun izlənilməsi, 10 minlərlə insanın ölümünə görə onlar günahkardır”, - Puççarelli belə deyir.
Vəkil bildirib ki, İŞİD tərəfdarları Liviyada məhz Sarkozinin maliyyələşdirdiyi üsyançıların nəzarət etdiyi ərazilərdə var.
Sarkozi isə ittihamları qəbul etmir. O, bildirir ki, Qəddafinin qohumları intiqam almaq üçün belə fikirlər səsləndirirlər.
Liviyalı milyarder Siyad Takiəddin bildirir ki, şəxsən Qəddafinin adından Sarkoziyə 5 milyon avro aparıb.
Hikmət Həsənov
Ölkə.Az
