"Rusiya və NATO yenidən Əfqanistanda toqquşacaq"

Ekspertin fikrincə, Rusiya və NATO Əfqanistanda nüfuz uğrunda rəqabət aparacaq.

ABŞ prezidenti Barak Obama seçkiöncəsi vədlərini yerinə yetirərkən amerika qoşunlarının Əfqanistandan tamamilə çıxarıldığını bəyan etdi. Həçinin 14 il bu ölkədə olan NATO-nun da missiyası yekunlaşdı. Bir aydan artıq ölkə daxilində prezident seçkilərinin ikinci turunun qalibini müəyyən etmək olmurdu. Beləliklə, 2015-ci il başladı və Əfqanistanı qarşıda çox böyük sınaqlar gözləyir.

Rusiyanın "Moskovskiy Komsomolets" qəzetinə danışan tanınmış ekspert, "Müasir əfqanistanın öyrənilməsi mərkəzinin" mütəxəssisi Andrey Serenko bildirib ki, 2015-ci ildə Rusiya və NATO Əfqanistanda nüfuz uğrunda rəqabət aparacaq.

"Fikrimcə, Rusiya və NATO əməkdaşlıq yox, məhz Əfqanistanda nüfuz uğrunda rəqabət aparacaq. Lakin, əlbəttə ki, Moskvanın narkopolislərin hazırlanması və helikopter parkına xidmətin göstərilməsi sahəsində yardımı qorunacaq. Düşünürəm ki, Rusiya və NATO-nu real əməkdaşlığa yalnız regionda terrorçu təşkilatlar tərəfindən yeni ümumi təhlükələr vadar edə bilər", - deyə ekspert qeyd edib.

NATO-nun Əfqanistandan getməsinə toxunan Andrey Serenko bildirib ki, Rusiya üçün alyansın regionu tərk etməsi Mərkəzi Asiyanın ali zümrəsi ilə işləməsi üçün yeni imkanlar açsa da, həm də problemlər yaratmış olur.

"Rusiya üçün NATO-nun Əfqanistanı tərk etməsi Mərkəzi Asiyanın ali zümrəsi, elitası ilə işləməsi üçün yeni imkanlar açır və eyni zamanda yeni problemlər yaradır. İmkanlar dedikdə elitaya strateji əməkdaşlıq və loyallıq qarşılığında NATO əvəzinə Rusiya müdafiə çətirinin təklif edilməsi nəzərdə tutulur. Problemlərə isə Mərkəzi Asiyanın Əfqanistanla olan sərhədlərinin qorunması və əvvəllər NATO-çuların məşğul olduğu, terrorçu təşkilatlara müqavimət göstərmək daxildir. Problem ondadır ki, Rusiya NATO ilə əməkdaşlığın effektiv düsturunu tapa bilmədi və ya sadəcə istəmədi. Bir çox şanslar artıq buraxılıb..." - deyə ekspert müsahibəsində qeyd edib.

Rəşid Mustafazadə

Ölkə.Az