Rinkeviç: "Krım məsələsi "dondurulmuş münaqişədir""

Latviya XİN hesab edir ki, Krım məsələsi artıq "dondurulmuş münaqişədir".

Ölkə.Az-ın "Kommersant" nəşrinə istinadən verdiyi xəbərə görə, Moskvaya səfər edən Latviya Xarici işlər naziri Edqar Rinkeviç bəyan edib ki, beynəlxalq ictimaiyyətin Rusiyaya birləşdirilməsini tanımadığı Krım məsələsi demək olar ki, artıq "dondurulmuş münaqişə" mərhələsinə keçib.

"Düşünürəm ki, biz artıq sizin "dondurulmuş münaqişə" adlandırdığınız həddə çatmışıq. Bu uzunmüddətlidir və bununla hesablaşmaq lazımdır", - deyə nazir "Kommersant"a müsahibəsində bildirib.

O, qeyd edib ki, Avropa İttifaqı tərəfindən Krımın birləşdirilməsi və anneksiya edilməsinin tanınmaması siyasəti çərçivəsində bütöv tədbirlər kompleksi barədə qərar qəbul edilib.

"Bu məsələ ilə bağlı istənilən danışıqlar yalnız Ukraynanın ərazi bütövlüyünə hörmət prinsipləri üzərində başlana bilər", - deyə Rinkeviç əlavə edib.

Rəşid Mustafazadə

Ölkə.Az