Rusiyalı jurnalist: "Rusiya düşmən olmayan yerdən düşmən axtarır"

Jurnalistin fikrincə, sadəcə xalqı dinləmək lazımdır.

Ölkə.Az erməni mətbuatına istinadən xəbər verir ki, "Dojd" telekanalının tanınmış jurnalisti Timur Olevskiy yerli kanallardan birinə müsahibəsində Gümrüdəki vəziyyətdən danışıb.

O, bildirib ki, Gümrüdə vəziyyətin gərginləşməsinə səbəb yuxarı dairələrin xalqı sadəcə olaraq dinləməməsidir. Onun fikrincə, bu hadisədə hər hansı amerika izinin axtarılması yersizdir və Rusiya KİV-də çıxış edən politoloqlar və jurnalistlərin Gümrü olaylarında xarici qüvvələrin barmağını axtarması doğru deyil.

"Mən ilk dəfə bura gəlirdim və Gümrü haqqında heç nə bilmirdim. Mənə elə gəlir ki, biz qeyri-rəsmi şəkildə insanlar kimi danışmağı tərgitmişik. Biz rəsmi danışıqlar, pafos olmadan sadəcə başsağlığı verməyi bacarmırıq. Yerli əhali erməni məmurların onları müdafiə etməsini və özlərini Rusiya prezident administrasiyasına tabe olan şəxslər kimi aparmamasını istəyirlər", - deyə jurnalist bildirib.

Xatırladaq ki, yanvarın 12-i rus hərbçi Gümrüdə 6 nəfərlik ailəni qətlə yetirmişdi.

Ölkə.Az