Dini bayrama görə atəşkəs elan olundu

Qondarma "Luqansk Xalq Respublikası"nın ("LXR") rəhbəri İqor Plotinski və Luqansk vilayətinin qubernatoru Gennadi Moskal arasında yanvarın 18-i və 19-u müddətində atəşkəs razılaşması əldə edilib. 

Buna səbəb həmin günlərdə pravoslav kilsəninin keçirəcəyi xaç suyuna salınma bayramı olub.

"Biz ilk dəfə olaraq ukraynalı qubernator Gennadi Moskala müraciət etmişik ki, 18 və 19 yanvar tarixlərində ikigünlük atəşkəs elan edilsin və Ukrayna tərəfi artilleriya atəşini saxlasın"-deyə Plotinski Luqanskın informasiya mərkəzində bəyan edib.

Luqanskın qubernatoru Moskal da öz növbəsində həmin müraciətə cavab olaraq bildirib ki, qondarma respublikanın rəhbərliyi tərəfindən irəli sürülən təkliflə razıdır. "Bu, yerli əhaliyə və hərbi qulluqçulara bayramı sülh və əminamanlıq şəraitində keçirmələrinə şərait yaradacaq"-deyə qubernator bildirib.

Moskal eyni zamanda təklif edib ki, özünü vətənpərvər hesab edən ukraynalılar Severskiy Donts çayına gedərək, orada xaç suyuna çəkilsinlər.

Qeyd edək ki, məhz bu çayın ətrafında "LXR" separatçıları ilə Ukrayna hərbçiləri arasında güclü atışmalar müşahidə olunmaqdadır və hazırda çayın həmin hissəsi Ukrayna hərbçilərinin nəzarətindədir. (sia.az)

Ölkə.Az