İstanbulda erməni jurnalist anıldı

O, 2007-də qətlə yetirilmişdi.

Ölkə.Az xəbər verir ki, bu gün İstanbulda Hrant Dinkin xatirəsinə anım yürüşü keçirilib. "Yerkramas.org"un məlumatına görə, Türkiyə vətəndaşları şəhərin müxtəlif yerlərində, o cümlədən Taksim meydanında toplaşaraq, "Agos" erməni qəzetinin redaksiyasının binasına doğru yürüş ediblər. Kürd Demokrat partiyasının deputatları isə bu vaxt küçələrdən birinə Hrant Dinkin adının verilməsi üçün imza toplayıblar.

Anım yürüşünə çıxan insanların çoxu erməni əsilli Türkiyə vətəndaşları olub. Onlar erməni, kürd və türk dillərində plakatlar qaldırıblar. Mərasimdə görünən şüarların çoxu "Hamımız erməniyik, hamımız Hrantıq!", "Hrantla, soyqırımla üz-üzə dayan!" tipli olub.

Erməni əsilli Türkiyəli jurnalist, "Agos" qəzetinin baş redaktoru Hrant Dink 2007-ci ilin 19 yanvar tarixində, yerli vaxtla saat 15:00 - də İstanbulda işlədiyi redaksiya binasının qarşısında sui-qəsd nəticəsində öldürülmüşdü.

O, qondarma erməni soyqırımının Türkiyədə tanınması, Türkiyə ermənilərinə daha çox imtiyazlar verilməsi və Türkiyə ilə Ermənistan arasında əlaqələrin yaxşılaşdırılması üçün çalışıb.

Rəşid Mustafazadə

Ölkə.Az