Qəddafinin generalları qayıdır

Qəddafinin generalları Liviya ordusuna xidmətə qayıdır.

Ölkə.Az BBC-nin ərəb xidmətinə istinadən xəbər verir ki, beynəlxalq səviyyədə tanınmış Liviya hökuməti üsyançı general Xəlifə Xaftar və Qəddafi vaxtının 108 sabiq ordu zabitini xidmətə dəvət edib.

Bu qərar Liviyanın hökumət və parlamentində hərbçilərin yüksələn nüfuzundan xəbər verir. Sözügedən hərbçilər məcburi şəkildə islamçıların dəstəklədiyi "Liviyanın səhər çağı" ("Liviyanın oyanışı") qruplaşmasının Tripolini ələ keçirməsi və Oma əl-Xasinin başçılılığı ilə hökumət qurmasından sonra ölkənin şərqinə köçməyə məcbur olmuşdu.

Baş nazir Abdalla Əbdürrəhman at-Taninin rəhbərlik etdiyi hökumət Xaftar və digər zabitlərin köməyilə Tripolidəki tanınmamış hökumət qarşısında mövqelərini möhkəmləndirməyə ümid edir.

Xaftar keçmiş lider Müəmmar Qəddafinin hakimiyyəti dövründə liviya ordusunun generalı olmuşdu. O, digər sərkərdələrlə birlikdə 2011-ci ildə Qəddafinin devrilməsindən sonra silahları yerə qoymaqdan imtina etmiş və Liviya milli ordusuna rəhbərlik etməyə başlamışdı.

Rəşid Mustafazadə

Ölkə.Az