Avrokomissar: \"Türkiyə axını həyatqabiliyyətli deyil\"

Avrokomissar "Türkiyə axını" layihəsini qeyri-həyatqabiliyyətli adlandırıb.

Ölkə.Az "The Wall Street Journal"a istinadən xəbər verir ki, Avrokomissiyanın energetika sahəsi üzrə məsul şəxsi olan Maroş Şefçoviç Rusiyanın "Türkiyə axını" layihəsinin tikintisi planlarının nəticəsiz olacağına əminliyini ifadə edib. O, bu barədə Davosda Dünya iqtisadi forumunda bəyan edib. Avrokomissar izah edib ki, layihənin 63 milyard kubmetrlik gücü potensial müştərilərin tələbatından yüksəkdir.

"Hesab edirəm ki, rusiyalılar bu varianta yenidən baxmaq və avropalı tərəfdaşlar üçün daha əlverişli olacaq həyatqabiliyyətli iqtisadi qərarlar düşünməlidir", - deyə Şefçoviç bildirib.

Bir müddət öncə Şefçoviç bəyan etmişdi ki, Avropa Rusiyanın qaz tədarükünü Ukraynadan tamamilə Türkiyə və Yunanıstan sərhədinə yönəltməsi qərarından təəcüblənib.

Xatırladaq ki, dekabrın 1-i Rusiya Federasiyasının prezidenti Vladimir Putin bildirmişdi ki, Rusiya "Cənub axını" layihəsini reallaşdırmayacaq. Sonradan "Qazprom" Türkiyəyə qaz kəmərinin tikintisi üçün "Qazprom Russkaya" müəssisəsinin yaradılmasını bəyan etmişdi.

Rəşid Mustafazadə

Ölkə.Az