Ermənistan müdafiə nazirliyindən sərsəm açıqlama

"Azərbaycan öz təyyarəsini vurub"

Bu gün Müdafiə Nazirliyi Ermənistanın pilotsuz uçan aparatının məhv edilməsi ilə bağlı məlumat yaymışdı.

Xəbər verdiyimiz kimi, yanvarın 29-da saat 14.00 radələrində cəbhənin Ağdam rayonu istiqamətində Silahlı Qüvvələrimizin mövqeləri üzərində Ermənistan Silahlı Qüvvələrinə məxsus pilotsuz uçan aparat (PUA) Hərbi Hava Qüvvələrimiz tərəfindən məhv edilib.

Hadisədən bir neçə saat sonra Ermənistan müdafiə nazirliyinin mətbuat katibi Artsrun Ovannisyan Facebook hesabında vurulan təyyarə ilə bağlı münasibət bildirib.

O, vurulan pilotsuz aparatın əslində Azərbaycana məxsus olduğunu iddia edib:

"Biz bilirik ki, Azərbaycana hətta köpüklü və uydurulmuş qələbələr lazımdır. Bəzən pilotsuz təyyarələr onların gözünə görünür. Bizim dəqiq məlumatlarımıza əsasən, Azərbaycan tərəfi öz pilotsuz təyyarəsini vurub. Azərbaycanlı "həmkarlar" səhv salıblar və tezliklə bu barədə yeni məlumatlar bizə daxil olacaq", - deyə mətbuat katibi yazıb.

Qeyd edək ki, bir müddət öncə saytımızda Ağdamda vurulan təyyarənin qalıqlarının fotoları yayımlanmışdı.

Rəşid Mustafazadə

Ölkə.Az