ABŞ-ın Dövlət katibi cərimələndi

Kerri 50 dollar ödəməlidir.

ABŞ Dövlət katibi Con Kerrini evinin qarşısında qarın təmizlənmədiyi üçün cərimə ediblər.

O, indi Boston xəzinəsinə 50 dollar ödəməlidir.

Yerli sakinlər siyasətçinin evinin şəklini çəkərək, onun mer Martin Uolşun evlərin qarşısındakı qarı təmizləmək barədə sərəncamını yerinə yetirmədiyini göstəriblər.

Kerrinin mətbuat katibi Qlen Conson isə bildirir ki, siyasətçi binanın qarşısındakı qarı təmizləyə bilməzdi, çünki, Səudiyyə Ərəbistanında səfərdə olub. Conson həmçinin Kerrinin köməkçilərinin də yerində olmadığını bildirib:

“Dövlət katibi böyük məmnuniyyətlə cəriməni ödəyəcək. Gəlin ümid edək ki, bu, il ərzində baş verə biləcək ən güclü boran idi”, - deyə, The Boston Herald Kerrinin mətbuat katibindən sitat gətirib. O, həmçinin əlavə edib ki, xəbərdarlıq alınan kimi səki qardan təmizlənib.

Qeyd edək ki, yanvarın 27-nə keçən gecə ABŞ-da güclü qarla müşahidə olunan qasırğa qeydə alınıb. Yarım metrədək qarın yağdığı Boston şəhərinin meri Martin Uolş şəhər sakinlərini kommunal xidmət işçilərinə yardım etməyə çağırıb. Onun sərəncamına əsasən, sakinlər evlərinin qarşısındakı qarı təmizləməli idilər./Oxu.az/