İtaliya yenə prezidentsiz qaldı

İkinci tur nəticəsiz olub.

Ölkə.Az RİA Novosti agentliyinə istinad edərək xəbər verir ki, İtaliya respublikasının on ikinci prezident seçkisinin ikinci turu nəticəsiz başa çatıb.

Birinci turda olduğu kimi, "böyük seçicilər" adlananların böyük əksəriyyəti doldurulmamış bülletenləri seçki qutularına atıb. Həm birinci, həm ikinci turda ən yaxşı nəticəni mafiya və terrorizmlə mübarizə aparan məşhur şəxs, keçmiş senator Ferdinando İmpozimato qazanıb.

Bu gün Bakı vaxtı ilə saat 18:30-da Monteçitorio Sarayında seçkinin 3-cü turu keçiriləcək. Çox güman ki, bu turda öncəki turun nəticələrinin yekunu aparılacaq. Faktiki olaraq yeni dövlət başçısının seçilməsi qərarı şənbəyə qədər təxirə salınıb. Dördüncü turda isə "böyük seçicilərin" Matarellanın namizədliyinə münasibətlərini bildirəcəyi gözlənilir.

İtaliya prezidenti vəzifəsi 14 yanvarda 89 yaşlı Corco Napolitanonun istefasından sonra boşalmışdı.

Konstitusiyaya əsasən, İtaliya prezidenti milli parlament tərəfindən ölkənin bütün bölgə nümayəndələrinin iştirakı ilə birgə iclasda seçilir. Seçki gizli şəkildə, toplaşanların səslərinin üçdə ikisi ilə aparılır.

Rəşid Mustafazadə

Ölkə.Az