İŞİD-in neft avadanlığı məhv edildi

ABŞ-ın və müttəfiqlərinin aviasiyası ötən sutka ərzində İŞİD terrorçu qruplaşmasının Suriya və İraqdakı mövqelərinə havadan 14 zərbə endirib. Bu haqda Birləşmiş Ştatların silahlı qüvvələrinin mərkəzi komandanlığı məlumat yayıb. 

Bombardmanlara qruplaşmanın Suriyanın Türkiyə ilə sərhəddəki Kobani şəhəri rayonundakı obyektləri məruz qalıb. Aviazərbələr nəticəsində ekstremistlərin Əl-Hasaka şəhəri yaxınlığındakı neft avadanlıqları məhv edilib. İraqın Mosul, Təl Əfar və Fəlluca şəhərləri ətrafında İŞİD-ə məxsus düşərgələr dağıdılıb.

2014-cü ilin avqustundan ABŞ başda olmaqla beynəlxalq koalisiya qruplaşmanın İraqda, sentyabrdan isə Suriyada yerləşən mövqelərinə aviazərbələr endirməkdə davam edir. Hava reydlərində bir sıra Qərb dövlətləri ilə yanaşı, Səudiyyə Ərəbistanı, Birləşmiş Ərəb Əmirlikləri, İordaniya və Bəhreyn təyyarələri də iştirak edirlər.

ABŞ Maliyyə Nazirliyinin məlumatına görə, İŞİD neft qaçaqmalçılığından hər gün 1 milyon dollara yaxın qazanc götürür. (AzərTAc)

Ölkə.Az