Obama Moskvanı hədələdi

ABŞ və Almaniya Rusiyaya qarşı sanksiyaların qüvvədə qalması ilə bağlı razılığa gəlib. 

Almaniyanın kansleri Anqela Merkel Vaşinqton səfəri çərçivəsində ABŞ prezidenti Barak Obama ilə görüşüb. Görüşdən sonra keçirilən birgə mətbuat konfransında Rusiyaya qarşı sanksiyaların davam etdiriləcəyi bildirilib. 

Barak Obama Rusiyanın Ukrayna məsələsində tutduğu mövqeyi tənqid edib:

“Rusiya xarici siyasət kursunu olduğu kimi saxlayarsa, sanksiyalar davam etdiriləcək. Və Rusiyaya qarşı siyasi və iqtisadi təcridetmə gücləndiriləcək. Rusiya bu böhranda uduzmaqdadır, xeyli itkiləri var. Biz münaqişənin sülh yolu ilə həllinin tərəfdarıyıq. Danışıqlar nəticə verməsə, biz Rusiyaya qarşı sanksiyaları daha da sərtləşdirməli olacağıq".

Obamanın sözlərinə görə, Merkellə görüşdə Ukraynaya silah yardımı ilə bağlı fikir mübadiləsi aparılıb: "Yekun qərar digər müttəfiqlərimizlə aparılacaq müzakirələrdən sonra veriləcək". 

Angela Merkel isə bildirib ki, Rusiya ilə aparılan danışıqlarda Ukraynanın ərazi bütövlüyü prinsipindən kənara çəkilməyəcəklər. 

Qeyd edək ki, görüş Rusiya prezidenti Vladimir Putin, Ukrayna prezidenti Petro Poroşenko, Fransa dövlət başçısı Fransua Olland və Almaniya kansleri Angela Merkel arasında Ukraynanın şərqində atəşkəsin dayandırılması ilə bağlı diplomatik səylərin intensivləşdiyi vaxta təsadüf edir. (ans)

Ölkə.Az