Danimarkada terrorun hədəfi olan isveçli danışdı

“France 24” TV kanalı Danimarkanın paytaxtı Kopenhagendə baş vermiş ilk terror hadisəsinin əsas hədəfi sayılan isveçli karikatura sənətçisi Lars Vilksdən müsahibə götürüb.

“Belə hücumlar məni qorxuda bilməz. Mən həmişəki kimi öz işimi davam etdirəcəyəm”, 68 yaşlı sənətçi deyib. O, əmindir ki, şənbə günü terrorçular məhz onu hədəf seçiblər. 

“Bir qədər də səmimi olsaq, mən terrorçuların hədəfi olmaq üçün elə bir namizəd görmürəm. Həyatıma ən yüksək səviyyədə təhdid altında uzun müddətdir ki, yaşayıram”, İslam peyğəmbəri Məhəmmədin (S) karikaturasını çəkdiyinə görə 2007-ci ildən təqib olunan isveçli haqqında TV kanal bəzi faktları xatırladıb. 

2010-cu ildə iki qardaş onun İsveçdəki evinə od vurmağa cəhd göstərib. Bu cəhdə görə onlar həbs olundu. 2014-cü ildə isə amerikalı qadın onu öldürmək üçün sui-qəsd palanı hazırladığına görə, 10 il azadlıqdan məhrum edilib. 

Televiziya xatırladır ki, İslam ənənəsinə görə, Məhəmməd peyğəmbərin fiziki görüntüsünü hər hansı bir formada canlandırmaq kafirlik hesab olunur. 

Vilks Kopenhagendəki məşhur kafedə “Sənət, kafirlik və söz azadlığı” mövzusunda çıxış edərkən atışma başlayıb. Həmin tədbir Parisdə “Charlie Hebdo” satirik jurnalının redaksiyasında baş vermiş qanlı terror olayına etiraz xarakteri daşıyırdı. 

“Bu surreal hadisə idi. Öncə mən nə baş verdiyini anlamadım”, o, deyir.

Atışma başlayan kimi polislər onu dərhal səhnədən uzaqlaşdırıb, onu və tədbirin təşkilatçısı olan qadını anbar kimi istifadə olunan təhlükəsiz otaqda gizlədiblər. 

“Həqiqətən də dramatik hadisə idi. Biz həmin otaqda haradasa 30 dəqiqə qalası olduq. Mən qorxmurdum, baxmayaraq ki, hər tərəfdən əlisilahlı polislərlə əhatə olunmuşdum... Terrorçular yalnız silahla aparılan danışığı başa düşürlər. Onlarla ifadə azadlığından danışmaq mənasız işdir. Onları başa salmaq çətindir ki, onların gördüyü iş mənasızdır. Biz öz yolumuzla gedəcəyik”, Lars Vilks deyib. (musavat)

Ölkə.Az