"Motorola" - "Apple" qarşıdurması davam edir

Dizaynerin tənqidinə cavab gəlib.

Ölkə.Az xəbər verir ki, "Apple"ın baş dizayneri Con İv ötən günlərdə verdiyi açıqlamada "Motorola"nı tənqid edib.

O verdiyi müsahibəsində dizayn məsələsinə toxunub:

"İstehlakçıya dizayn mövzusunda çox variant verməmək lazımdır. Məncə, bunu etmək dizayner olaraq məsuliyyətdən qaçmaq kimidir", - deyə Con İv "Motorola"ya işarə edib.

2011-ci ildə "Google"un satın aldığı "Motorola" təqdim etdiyi "Moto Maker" xidmətiylə müştərilərinə alacaqları telefonda istifadə edəcəkləri material və rəngləri seçmə imkanı verib. Con İv də məhz bu xidmətin əslində asana qaçmaq olduğunu ifadə edib.

İvin bu sözlərinə "Motorola"dan cavab gecikməyib. Belə ki, "Motorola"nın başçısı Rik Osterloh verdiyi açıqlamada firmasının "Apple"dan fərqli fəlsəfəyə sahib olduğunu söyləyib.

"Sektor ikiyə bölünmüş vəziyyətdədir. Bir tərəfdə "Apple" kimi çox pul qazanan və məhsulları üçün hədsiz qiymətlər istəyənlər var. Biz gələcəyi fərqli görürük. Hər kəsin çata biləcəyi qiymətlərdə əla istifadəçi təcrübəsi təqdim etmək istəyirik", - deyə başçı qeyd edib.

Ölkə.Az